வாழ்நாள் சாதனையாளர் விருது பெறும் ரஜினிக்கு கமல்ஹாசன் வாழ்த்து

கோவா சர்வதேச திரைப்பட விழாவின் பொன்விழா ஆண்டில் சூப்பர்ஸ்டார் ரஜினிகாந்தை கெளரப்படுத்தும் விதமாக அவருக்கு 'ஐகான் ஆஃப் கோல்டன் ஜூப்ளி' விருது அறிவிக்கப்பட்டிருப்பது ரசிகர்களை மட்டுமல்லாமல், திரையுலக பிரபலங்களையும் மகிழ்ச்சியடைய வைத்துள்ளது. பலரும் ரஜினிகாந்தை வாழ்த்து மழையில் நனைய வைத்துவருகின்றனர்.

சென்னை: கோவா திரைப்படவிழாவில் வாழ்நாள் சாதனையாளர் விருது பெறவிருக்கும் நடிகர் ரஜினிகாந்துக்கு, தொலைப்பேசியில் கமல்ஹாசன் வாழ்த்து தெரிவித்துள்ளார்.

கோவா சர்வதேச திரைப்பட விழாவின் 50வது ஆண்டு விழா இம்மாதம் 20 முதல் 28ஆம் தேதி வரை நடைபெறவுள்ளது. இந்த விழாவில் சினிமாத்துறையில் சிறப்பான பங்களிப்பை அளித்ததற்காக நடிகர் ரஜினிகாந்துக்கு 'ஐகான் ஆஃப் கோல்டன் ஜூப்ளி' விருது வழங்கப்படும் என மத்திய அரசு அறிவித்துள்ளது. இதற்கு திரையுலகைச் சேர்ந்த பல்வேறு பிரபலங்கள் அரசியல் பிரமுகர்கள் என நடிகர் ரஜினிகாந்துக்கு பலரும் வாழ்த்துகளை தெரிவித்துவருகின்றனர்

ரஜினிகாந்துக்கு இந்த விருது அளிக்கப்பட்டிருப்பது குறித்து செய்தியைக் கேள்விப்பட்ட நடிகர் கமலஹாசன், அவருக்கு தனது வாழ்த்தையும் தெரிவித்துள்ளார்.

தற்போது மத்தியபிரதேச மாநிலம் போபாலில் 'இந்தியன் 2' படப்பிடிப்பில் பங்கேற்றுள்ள கமல்ஹாசன், நடிகர் ரஜினிகாந்தை தொலைபேசியில் தொடர்பு கொண்டு தனது வாழ்த்துகளை தெரிவித்தார்.