'உலகின் இனிமையான புன்னகை'; கரோனா பாசிட்டிவை வித்தியாசமாக தெரிவித்த கஜோல்!

பாலிவுட் நடிகை கஜோல் தனக்கு கரோனா தொற்று உறுதி செய்யப்பட்டுள்ளது என தனது இன்ஸ்டாகிராம் பக்கத்தில், அவரது மகளின் புகைப்படத்தினை பதிவிட்டு வித்தியாசமாக தெரிவித்துள்ளார்.

பாலிவுட் நடிகை கஜோல் மேற்கொண்ட கரோனா பரிசோதனையில் இன்று (ஜன.30) அவருக்கு தொற்று உறுதி செய்யப்பட்டுள்ளது. தொற்று உறுதியானதை தனது இன்ஸ்டாகிராம் பக்கத்திலும் அவர் பகிர்ந்து கொண்டுள்ளார். அவரது பதிவில் தனது புகைப்படத்துக்குப் பதிலாக, தனது மகளின் புகைப்படத்தை இணைத்து அவர் பதிவிட்டுள்ளார்.

அதில், “பரிசோதனை முடிவு பாசிட்டிவ் என வந்துள்ளது. எனது சிவந்த மூக்கை யாரும் பார்க்க விரும்பவில்லை. ஆகையால் உலகின் இனிமையான இந்த புன்னகையுடன் ஒட்டிக்கொள்வோம்!” என பதிவிட்டுள்ளார். இதனைக் கண்ட அவரது ரசிகர்கள் கஜோல் விரைவில் குணமடையுங்கள் என பிரார்த்தனை பதிவுகளைப் பதிவிட்டு வருகின்றனர்.

கஜோல் இன்ஸ்டாகிராம் பதிவு

கஜோல் - அஜய் தேவ்கன் தம்பதியின் மகள் நைசாவுக்கு 18 வயதாகிறது. மும்பையின் திருபாய் அம்பானி சர்வதேச பள்ளியில் தனது படிப்பை முடித்த பிறகு, நைசா 2018ஆம் ஆண்டின் தொடக்கத்தில் சிங்கப்பூரில் உள்ள யுனைடெட் காலேஜ் ஆஃப் சௌத்ஈஸ்ட் ஏசியாவில் சேர்ந்தார். இந்த நட்சத்திர ஜோடிக்கு 11 வயதில் யுகின் என்ற மகனும் உள்ளார் என்பது குறிப்பிடத்தக்கது.

இதையும் படிங்க:விஷாலின் 'வீரமே வாகை சூடும்' ரிலீஸ் தேதி அறிவிப்பு!