திரைப்படமாகவுள்ள மாவீரன் நெப்போலியனின் போர் வரலாறு!

’ஜோக்கர்’ திரைப்படத்தில் நடித்து உலகம் முழுவதுமுள்ள ஏராளமான திரை ரசிகர்களின் மனதையும், சென்ற ஆண்டுக்கான ஆஸ்கர் விருதையும் அள்ளிய ஹாலிவுட் நடிகர் வகீன் ஃபீனிக்ஸ், நெப்போலியன் போனபார்ட்டாக நடிக்க உள்ளார்.

’முதலாம் நெப்போலியன்’ என அழைக்கப்படும் வரலாற்றின் மாபெரும் வீரர்களில் ஒருவரான பிரஞ்சுப் பேரரசர் நெப்போலியன் போனபார்ட்டின் வரலாறு விரைவில் திரைப்படமாக உள்ளது.

’கிட்பேக்’ எனப் பெயரிடப்பட்டுள்ள இந்தப் படத்தில், சென்ற ஆண்டின், ஹாலிவுட்டின் மிகப்பெரும் வெற்றிப் படமான ’ஜோக்கர்’ திரைப்படத்தில் நடித்து, சிறந்த நடிகருக்கான ஆஸ்கர் விருதைத் தட்டிச் சென்ற நடிகர் வகீன் ஃபீனிக்ஸ், நெப்போலியன் போனபார்ட்டாக நடிக்கிறார். ’க்ளேடியேட்டர்’, ’பிளேட் ரன்னர்’ ஆகிய திரைப்படங்களை இயக்கிய பிரபல இயக்குநர் ரைட்லி ஸ்காட் இந்தப் படத்தை இயக்குகிறார்.

கடந்த 2000ஆம் ஆண்டு வெளியாகி ஆஸ்கர் விருதுகளை அள்ளிய க்ளேடியேட்டர் திரைப்படத்தில் முன்னதாக ரைட்லி ஸ்காட்டுடன் இணைந்துப் பணியாற்றிய வகீன் ஃபீனிக்ஸ், ’கிட்பேக்’ திரைப்படத்திற்காக மீண்டும் அவருடன் இணைந்துள்ளது, ஹாலிவுட் ரசிகர்களிடையே பெரும் எதிர்ப்பார்ப்புகளைக் கிளப்பியுள்ளது.

ராணுவப் படையினர், பொதுவாக தங்களது உடைகள், உடைமைகளைக் கொண்டு செல்லும் நீண்ட குறுகிய பைக்கு ’கிட்பேக்’ என்று பெயர்.

இந்நிலையில், மாபெரும் வரலாற்று வீரரும், பிரெஞ்சுப் பேரரசருமான நெப்போலியன் போனபார்ட்டின் புகழ்பெற்ற போர்கள், இடைவிடாத லட்சியம், ராணுவத் தளபதியாக அவர் வகுத்த அபாரமான திட்டங்கள், போர் தந்திரங்கள் ஆகியவற்றை மையப்படுத்தி இந்தப் படத்தின் கதை இருக்கும் என எதிர்ப்பார்க்கப்படுகிறது.

இதையும் படிங்க :நெட்ஃப்ளிக்ஸின் புதிய படத்தில் ஒன்றிணையும் ஹாலிவுட் நட்சத்திரப் பட்டாளம்!