பெண்கள் தங்களுக்கு நேர்ந்த பாலியல் துன்புறுத்தல்களை 'மீ டூ' மூலம் உலகிற்கு தெரியப்படுத்தி வருகின்றனர். இதில் கவிஞர் வைரமுத்து மீது பாடகி சின்மயி தெரிவித்த புகார் தமிழ் திரையுலகில் பெரும் சர்ச்சையை ஏற்படுத்தியது. இதேபோல் அமலாபால் உள்ளிட்ட சில நடிகைகளும் மீ டூ குற்றச்சாட்டு தெரிவித்தனர்.
இந்நிலையில் திரைக் கலைஞர்கள் சுதந்திரமாக செயல்பட, அவர்களின் பாதுகாப்புக் கருதி ஒரு குழு அமைக்க வேண்டும் என்ற கோரிக்கை வலுவடைந்தது.
இதைத்தொடர்ந்து, ஒன்பது பேர் கொண்ட ஒருங்கிணைப்புக் குழுவை தென்னிந்திய நடிகர் சங்கம் அமைத்துள்ளது. நடிகர் சங்கத் தலைவர் நாசர் தலைமையில் அமைந்துள்ள இந்தக் குழுவில் விஷால், கார்த்தி, பூச்சி முருகன், குஷ்பு, ரோகிணி, சுஹாசினி ஆகியோருடன் சமூக செயற்பாட்டாளர்கள், வழக்கறிஞர்கள் உள்ளிட்டோர் இடம் பெற்றுள்ளனர்.
இந்த 'மீ டூ' ஒருங்கிணைப்புக் குழுவிற்கான முதல் ஆலோசனைக் கூட்டம் இன்று சென்னையில் நடைபெற்றது. அதில் நடிகர் சங்க செயற்குழு உறுப்பினர்கள் பூச்சி முருகன்,லலிதா குமாரி, நடிகை சுஹாசினி, ரோகிணி, நடிகர் கிட்டி, பொருளாளர் கார்த்தி மற்றும் வழக்கறிஞர் கிருஷ்ணா ரவீந்திரன் ஆகியோர் கலந்துகொண்டனர்.