எச்.வினோத் இயக்கத்தில், நடிகர் அஜித் நடிப்பில் உருவாகியுள்ள படம் ’வலிமை’. இத்திரைப்படத்தை மறைந்த பிரபல நடிகையான ஸ்ரீதேவியின் கணவர் போனி கபூர் தயாரிக்கிறார். இதில் ஹூமா குரேஷி, கார்த்திகேயா உள்ளிட்டோர் முக்கிய வேடத்தில் நடிக்க, யுவன் சங்கர் ராஜா இசையமைத்துள்ளார்.
முன்னதாக கரோனா ஊரடங்கை அடுத்து படம் குறித்து எந்த ஒரு அதிகாரப்பூர்வ தகவலும் வராத நிலையில், வலிமை படத்தின் அப்டேட் கேட்டு அஜித் ரசிகர்கள் ஏராளமான அலப்பறைகள் செய்து வந்தனர். ரசிகர்களின் இந்தச் செயலை கண்டித்து நடிகர் அஜித் சில நாள்களுக்கு முன்னர் அறிக்கை கூட வெளியிட்டிருந்தார்.