ரஜினி நடிப்பில் உருவாகியுள்ள படம் 'அண்ணாத்த'. 'சிறுத்தை' சிவா இயக்கியுள்ள இப்படத்தை சன் பிக்சர்ஸ் நிறுவனம் தயாரித்துள்ளது.
இந்தப் படத்தில் ரஜினியுடன் நயன்தாரா, குஷ்பூ, மீனா, கீர்த்தி சுரேஷ், சூரி, பிரகாஷ் ராஜ், ஜெகபதி பாபு, சதீஷ் உள்ளிட்டோர் முன்னணிக் கதாபாத்திரங்களில் நடித்துள்ளனர். டி.இமான் இசையமைத்துள்ளார்.
தெலுங்கில் 'பெத்தண்ணா'
'அண்ணாத்த' திரைப்படம் தீபாவளி வெளியீடாக நாளை (நவம்பர் 4) திரையரங்குகளில் வெளியாகிறது. தெலுங்கில் 'பெத்தண்ணா' என்ற பெயரிலும் ரிலீஸ் ஆகிறது.
இப்படத்தின் பாடல்கள், டீஸர், ட்ரெய்லர் என அனைத்தும் ரசிகர்கள் மத்தியில் பெரும் வரவேற்பைப் பெற்றது. நாளை (நவம்பர் 4) 'அண்ணாத்த' படத்தின் முதல் காட்சியைப் பார்ப்பதற்கு ரசிகர்கள் பெரும் ஆவலுடன் காத்திருக்கின்றனர்.
இந்நிலையில், 'சிறுத்தை' சிவா 'அண்ணாத்த' படத்தில் பணியாற்றிய அனுபவம் குறித்த வீடியோவை, சன் பிக்சர்ஸ் நிறுவனம் தனது ட்விட்டர் பக்கத்தில் பதிவிட்டுள்ளது.
அதில் சிவா கூறியிருப்பதாவது, 'ரொம்ப சந்தோஷமான அனுபவம். சன் பிக்சர்ஸ் நிறுவனம் நல்ல சப்போர்ட் பண்ணுனாங்க. மாறன் சார் 'அண்ணாத்த' படத்தின் கதையை நன்கு ரசித்துக் கேட்டார். கதை கேட்டு முடித்தவுடன் படம் சூப்பர் டூப்பர் ஹிட் அடிக்கும்னு சொன்னாரு.
இறுக்கி அணைத்து உம்மா கொடுத்த ரஜினி
ஒரு படத்துக்கு ஒரு தீம் மியூசிக் இருக்கும். ஆனா 'அண்ணாத்த' படத்தில் மூன்று தீம் மியூசிக் இருக்கும். மூன்றும் வெவ்வேறாக இருக்கும். ரசிகர்கள் நிச்சயம் ரசிப்பார்கள். அதில் இமானின் மேஜிக் தெரியும்.
'அண்ணாத்த' படத்தைப் பார்த்து விட்டு, வெளியே வந்த ரஜினி, மாறன் சாரை பார்த்து நன்றி தெரிவித்தார். பின் என்னைத் திரும்பி பார்த்து, கட்டிப்பிடித்து கன்னத்தில் முத்தம் கொடுத்தார்.
ஒரு இயக்குநரா அத்தருணம் எனக்கு மறக்கவே முடியாது. படம் பார்க்குற எல்லாருக்கும் முழு திருப்தியும் சந்தோஷத்தையும் கொடுக்கும் 'அண்ணாத்த' ' என்றார்.
இதையும் படிங்க: பேரன்களுடன் 'அண்ணாத்த' பார்த்த ரஜினி!
