'நாய்கள் ஜாக்கிரதை', 'மிருதன்', 'டிக் டிக் டிக்' ஆகிய படங்களைத் தொடர்ந்து இயக்குநர் சக்தி சௌந்தர்ராஜன் இயக்கத்தில் உருவாகியுள்ள திரைப்படம் ‘டெடி’. ஆர்யா கதாநாயகனாக நடித்துள்ள இப்படத்தில் நாயகியாக சாயிஷா நடித்துள்ளார்.
இவர்களுடன் இணைந்து கருணாகரன், சதீஷ், மகிழ் திருமேனி, மாசூம் ஷங்கர், சாக்ஷி அகர்வால் உள்ளிட்ட பலர் நடித்துள்ளனர். ஸ்டுடியோ கிரீன் நிறுவனம் தயாரித்த இந்தப்படத்திற்கு டி. இமான் இசையமைத்துள்ளார். ஓடிடி தளமான டிஸ்னி+ஹாட் ஸ்டாரில் மார்ச் 19ஆம் தேதி வெளியான 'டெடி' ரசிகர்கள் மத்தியில், நல்ல வரவேற்பை பெற்றது.
கோமாவுக்கு சென்ற ஹீரோயினின் நினைவுகள் டெடியில் நுழைந்துவிடுகிறது. பின் அதிலிருந்து எப்படி மீண்டும் ஹீரோயினின் உடலுக்கு நுழைகிறது என்பது படத்தின் மீதி கதை. அதிலும் குறிப்பாக இந்தப் படத்தில் வரும் டெடி குழந்தைகளை வெகுவாகக் கவர்ந்தது. இந்த டெடியை வைத்து நெட்டிசன்கள் மீம்ஸ்களை உருவாக்கி சமூக வலைதளத்தில் கலக்கினர்.
இதனையடுத்து தற்போது சக்தி சௌந்தர்ராஜன் - ஆர்யா மீண்டும் ஒரு புதிய படத்தில் இணையவுள்ளதாக தகவல் வெளியாகியுள்ளது. மேலும் இப்படம் அதிரடி ஆக்சன் படமாக இருக்கும் எனவும் கூறப்படுகிறது. இதுகுறித்தான அதிகாரப்பூர்வ தகவல் விரைவில் வெளியாகும் என எதிர்பார்க்கப்படுகிறது.
இதையும் படிங்க: ரௌடி பேபி பாடலுக்கு நடனமாடும் சாயிஷா பேபி
