வாடிவாசலில் களமிறங்கும் 'வடசென்னை ராஜன்'...?

வெற்றிமாறன் இயக்கத்தில் சூர்யா நடிக்கும் ‘வாடிவாசல்’ படத்தில், இயக்குநர் அமீர் நடிக்கவுள்ளதாக தகவல்கள் வெளியாகியுள்ளன.

சி.சு.செல்லப்பா எழுதிய ‘வாடிவாசல்’ எனும் நாவலைத் தழுவி அதே பெயரில் வெற்றிமாறன் படம் இயக்கவுள்ளார். சூர்யா இந்தப் படத்தின் முன்னணி கதாபாத்திரம் ஏற்று நடிக்கவிருக்கிறார். சமீபத்தில் இதன் டைட்டில் லுக் வெளியாகி சமூக வலைதளங்களில் வைரலானது.

கரோனா கராணமாக தள்ளி வைக்கப்பட்டிருக்கும் ‘வாடிவாசல்’ படப்பிடிப்பு விரைவில் தொடங்கவுள்ளது. இந்தப் படத்தை கலைப்புலி தாணு தயாரிக்கிறார். தற்போது வாடிவாசல் படத்தில் இயக்குநர் அமீர் முக்கியக் கதாபாத்திரத்தில் நடிக்கவிருப்பதாக தகவல்கள் வெளியாகியுள்ளது.

அமீர் ஏற்கனவே வெற்றிமாறன் இயக்கத்தில் வெளியான வடசென்னை படத்தில் ராஜன் கதாபாத்திரத்தில் நடித்திருந்தார். இந்தக் கதாபாத்திரம் ரசிகர்கள் மத்தியில் நல்ல வரவேற்பைப் பெற்றது.

'வாடிவாசல்' படத்திலும் அமீருக்கு ராஜன் போன்ற அழுத்தமான கதாபாத்திரம் இருக்கலாம் என ரசிகர்கள் ஆவலுடன் எதிர்பார்த்திருக்கின்றனர். இதுகுறித்த அதிகாரப்பூர்வ அறிவிப்பு விரைவில் வெளியாகும் எனவும் எதிர்பார்க்கப்படுகிறது.