விஜய்யுடன் பணியாற்றுவது எனக்கு புது அனுபவம் - இயக்குநர் வம்சி

தமிழில் முன்னணி நட்சத்திரமான விஜய்யை வைத்து புதிய படத்தை இயக்குவது எனக்கு புது அனுபவம் என இயக்குநர் வம்சி தெரிவித்துள்ளார்.

தமிழில் கார்த்தியை வைத்து 'தோழா' படத்தை இயக்கியவர் வம்சி பைடிபள்ளி. தெலுங்கு சினிமாவில் முன்னணி இயக்குநராக வலம் வரும் வம்சி பைடிபள்ளி இயக்கத்தில் மகேஷ்பாபு நடித்த ’மகரிஷி’ திரைப்படம் சிறந்த பொழுதுபோக்கு திரைப்படத்திற்கான தேசிய விருது பெற்றது.

இதனைத் தொடர்ந்து வம்சி விஜய்யை வைத்து 'தளபதி 66' படத்தை இயக்கவுள்ளார். இப்படத்தை தில் ராஜூ தயாரிக்கிறார். இப்படம் தமிழ், தெலுங்கு ஆகிய இரு மொழிகளில் வெளியாகிறது. இதற்கான அதிகாரப்பூர்வ அறிவிப்பு நேற்று (செப்.26) வெளியானது. இந்த அறிவிப்பால் விஜய் ரசிகர்கள் மகிழ்ச்சி அடைந்தனர்.

இந்த அறிவிப்பை தொடர்ந்து தில் ராஜூ, இயக்குநர் வம்சி, அவரது குடும்பத்தினர் திருப்பதியில் சாமி தரிசனம் செய்தனர். அப்போது அங்கு வைத்து செய்தியாளர்களை சந்தித்த வம்சி கூறுகையில், " 'மகரிஷி' படத்துக்கு தேசிய விருது அறிவித்த பின் இங்கு வந்து சாமி தரிசனம் செய்ய நினைத்தோம்.

ஆனால் அப்போது கரோனா தொற்று அதிகமாக பரவிக் கொண்டிருந்தால் வரமுடியவில்லை. இப்போது விஜய்யை வைத்து புதிய படம் இயக்குவதற்கான அறிவிப்பை வெளியிட்டுள்ளோம். எனவே இது சாமி தரிசனம் செய்ய சரியான நேரம் என நானும் தில் ராஜூம் நினைத்தோம்.

கடவுளின் ஆசியில்லாமல் எதுவும் நடக்காது என்று நம்புபவர்கள் நாங்கள். இந்தப் படம் அனைவருக்கும் பிடிக்கும் விதத்தில் இருக்கும். இதைதான் என்னால் இப்போது கூற முடியும்.

விஜய் ஒவ்வொரு படத்திலும் புதிதாகத் தெரிவார். அவருடன் பணியாற்றுவது எனக்கு புது அனுபவம். தமிழ் சினிமாவில் உச்ச நட்சத்திரமாக இருக்கும் விஜய்யை இயக்கும் வாய்ப்பு கிடைத்தது இறைவனின் அருளால்தான். இன்னும் சில நாள்களில் படம் குறித்தான மற்ற விவரங்களை வெளியிடுவோம். அதுவரை காத்திருங்கள்" என வம்சி தெரிவித்துள்ளார்.