கோலிவுட்டில் அவதாரம் எடுக்கும் வார்னர்!

ஆஸ்திரேலிய கிரிக்கெட் வீரர் டேவிட் வார்னர் தன்னுடைய இன்ஸ்டாகிராம் பக்கத்தில் விஜய்யின் படக்காட்சியில் தன் முகத்தை இணைத்து வெளியிட்ட வீடியோ தற்போது சமூக வலைதளத்தில் வைரலாகி வருகிறது.

ஆஸ்திரேலியாவின் அதிரடி கிரிக்கெட் வீரரான டேவிட் வார்னர், சமூக வலைதளங்களில் எப்போதும் ஆக்டிவாக இருப்பவர். அவ்வப்போது இவர் பதிவிடும் பதிவுகள் பட்டித்தொட்டி எங்கும் பட்டையைக் கிளப்பும் வகையில் வைரலாகிவிடும். தெலுங்கு பாடலான 'புட்டபொம்மா... புட்டபொம்மா' பாடலுக்கு டிக்-டாக்கில் குடும்பத்துடன் இவர் போட்ட குத்தாட்டம் இணையத்தில் செம டிரெண்டிங் ஆனது.

அதனைத் தொடர்ந்து வார்னர் 'பாகுபலி' பட வசனங்களை பேசியும் வெளியிட்ட வீடியோ தென்னிந்தியா ரசிகர்களை கவர்ந்து. அதுவரை டிக்-டாக்கில் வீடியோ செய்து தனது சமூக வலைதளத்தில் பதிவிட்ட வார்னர், இந்தியாவில் டிக்-டாக் தடை செய்தையடுத்து ஃபேஸ் ஆப் மூலம் வீடியோ எடுத்து தனது சமூக வலைதளத்தில் பதிவிட்டார்.

இந்த ஆப்பில் படத்தின் நாயகனின் முகத்திற்குப் பதிலாக தனது முகத்தை வைத்து வசனங்களை பேசலாம். இந்த ஆப்பை பயன்படுத்தி டேவிட் வார்னர் வெளியிடும் வீடியோ ரசிகர்களை வெகுவாக கவர்ந்து வருகிறது. சமீபத்தில் இவர் சூப்பர் ஸ்டார் ரஜினிகாந்தின் '2.0', 'தர்பார்' உள்ளிட்ட படங்களின் காட்சியில் ரஜினியாக தோன்றி ரசிகர்களை பரவசத்தில் ஆழ்த்தினார். அதேபோன்று கமல்ஹாசன் தொகுத்து வழங்கிய 'பிக்பாஸ்' நிகழ்ச்சியில் கமல் போன்றே முகப்பாவனை செய்து கலக்கியுள்ளார் வார்னர்.

இதனைத் தொடர்ந்து தற்போது தளபதி விஜய்யின் மாஸ்டர், சர்க்கார், கத்தி ஆகிய படங்களின் சூப்பர் ஹிட் சீன்களை எடுத்து, டேவிட் வார்னர் 'தளபதி' ஆக மாறியுள்ளார். இவர் வெளியிட்டுள்ள இந்த வீடியோக்களுக்கு தற்போது சமூகவலைதளத்தில் விஜய் ரசிகர்கள் லைக்குளை அள்ளி குவிக்கின்றனர். அதுமட்டுமல்லாது சமூகவலைதளத்தில் அதிகமாக பரப்பியும் வருகின்றனர்.

ஏற்கனவே டேவிட் வார்னர் தெலுங்கில் வெளியான 'போக்கிரி' படத்தின் வசனத்தை பேசி வெளியிட்ட வீடியோவை பார்த்து இயக்குநர் பூரி ஜெகன்நாத் தான் அடுத்து இயக்கும் படத்திற்கு வாய்ப்பு வழங்க இருப்பதாக தெரிவித்திருந்தார். இந்நிலையில், தற்போது வார்னர் தமிழ் படங்கள் காட்சிகளை எடுத்து வீடியோ வெளியிட்டு வருவதையடுத்து ரசிகர்களும், அவரை தமிழ் நயாகனாக வரவேற்கத் தொடங்கியுள்ளனர். இதனால் டேவிட் வார்னரும் ஹர்பஜன் சிங் போல் தமிழ் சினிமாவில் நடித்தாலும் ரசிகர்கள் அவருக்கு ஏக போக வரவேற்பை அளிக்கவும் தயாராக இருப்பார்கள் என்பதில் சந்தேகம் இல்லை.