தனுஷின் 'அசுரன்' படத்தின் ரிலீஸ் தேதி அறிவிப்பு

பூமணியின் ‘வெக்கை’ நாவலை மையமாக கொண்டு உருவாகி வரும் 'அசுரன்' படம், வரும் அக்டோபர் 2 ஆம் தேதி வெளியிடப்படுவதாக படக்குழு அதிகாரப் பூர்வமாக அறிவித்துள்ளது.

'வடசென்னை' படத்தின் வெற்றியைத் தொடர்ந்து இயக்குநர் வெற்றிமாறன்- நடிகர் தனுஷ் கூட்டணி, அசுரன் படத்திற்காக மீண்டும் இணைந்துள்ளது. இப்படம் பிரபல எழுத்தாளர் பூமணியின் 'வெக்கை' நாவலை அடிப்படையாகக் கொண்டு தயாராகி வருகிறது.

இந்த படத்தில் நடிகை மஞ்சு வாரியர், நடிகர் பசுபதி, இயக்குநர்கள் பாலாஜி சக்திவேல், சுப்பிரமணிய சிவா ஆகியோர் நடித்து வருகின்றனர். இதில் தனுஷ் ஒரே கதாபாத்திரத்தில் மூன்று விதமான தோற்றங்களில் நடித்து வருகிறார். இந்த படம் வரும் அக்டோபர் மாதம் 2-ஆம் தேதி வெளியிடப் படக்குழு திட்டமிட்டுள்ளதாகக் கூறப்படுகிறது.

கடந்தாண்டு அக்டோபர் 17ஆம் தேதி வெற்றிமாறன் - தனுஷின் கூட்டணியில் 'வடசென்னை' வெளியாகி வெற்றிப் பெற்றது. சென்டிமென்டாக அக்டோபர் மாதத்தில் 'அசுரன்' படத்தையும் வெளியிட உள்ளதாகக் கூறப்படுகிறது. தனுஷ் - வெற்றிமாறன் கூட்டணியில் வந்த 'பொல்லாதவன்', 'ஆடுகளம்' என்ற இரு படங்களும் வெளியாகி வெற்றிபெற்றது. தேசிய விருது உட்பட பல்வேறு விருதுகளையும் இருவருக்கும் பெற்றுக் கொடுத்தது. இதனால் அசுரன் படத்தின் வெளியீடுக்காக ரசிகர்கள் பெரும் ஆவலோடு காத்திருக்கின்றனர்.