இர்ஃபானுடன் நடித்த பெருமிதம் எனக்கு உண்டு! - ஏஞ்சலினா ஜோலி

பிரபல ஹாலிவுட் நடிகை ஏஞ்சலினா ஜோலி, நடிகர் இர்ஃபான் கானின் மறைவிற்கு வருத்தம் தெரிவித்து செய்தி வெளியிட்டுள்ளார்.

2018ஆம் ஆண்டு முதல் புற்றுநோய் பாதிப்பிற்குள்ளாகி சிகிச்சைப் பெற்றுவந்த பாலிவுட் நடிகர், சிகிச்சைப் பலனின்றி நேற்று உயிரிழந்தார். ஸ்டார் அந்தஸ்திற்காக போட்டி போட்டு நடிக்கும் பாலிவுட் திரையுலகிலிருந்து தனது தனித்துவ நடிப்பால் பெரும் ரசிகர் பட்டாளத்தை சம்பாதித்த வெகு சில நடிகர்களில் இர்ஃபான் கானும் ஒருவர்.

பாலிவுட் தாண்டி உலகம் முழுவதும் உள்ள திரை ரசிகர்களைத் தனது நடிப்பாற்றலால் கவர்ந்த இர்ஃபான், 'ஸ்லம்டாக் மில்லியனர்', 'லைஃப் ஆஃப் பை', 'ஜுராஸிக் வேர்ல்டு', 'அமேசிங் ஸ்பைடர் மேன்' உள்ளிட்ட ஹாலிவுட் படங்களிலும் தோன்றி உலகம் அறியும் இந்திய முகங்களில் ஒன்றாகத் திகழ்ந்துவந்தார்.

இந்நிலையில், ’எ மைட்டி ஹார்ட்’ திரைப்படத்தில் இர்ஃபானுடன் நடித்திருந்த பிரபல ஹாலிவுட் நடிகை ஏஞ்சலினா ஜோலி, இர்ஃபான் குறித்த ஞாபங்களை நினைவுகூர்ந்து செய்தி வெளியிட்டுள்ளார்.

அதில் ”இர்ஃபானுடன் ’எ மைட்டி ஹார்ட்’ படத்தில் தோன்றிய பெருமிதம் எனக்கு உண்டு. பெருந்தன்மை மிக்க நடிகர் அவர். அதனாலேயே அவருடன் நடித்தது எனக்கு மிகப்பெரும் மகிழ்ச்சியைக் கொடுத்தது.

வேலையின் மீதான அவரது அர்ப்பணிப்பு குறித்தும் அவரது புன்னகைக் குறித்தும் எனக்குத் தெரியும். இர்ஃபானின் குடும்பத்தினருக்கும், உலகம் முழுவதும் உள்ள அவரது ரசிகர்களுக்கும் என்னுடைய ஆழ்ந்த இரங்கல்களைத் தெரிவித்துக் கொள்கிறேன்” எனத் தெரிவித்துள்ளார்.

2007ஆம் ஆண்டு வெளிவந்த எ மைட்டி ஹார்ட் திரைப்படம், 2003இல் அதே பெயரில் வெளிவந்த வாழ்க்கை வரலாற்றுப் புத்தகத்தைத் தழுவி எடுக்கப்பட்டதாகும்.

இதையும் படிங்க:இர்ஃபான் கான் மறைவுக்கு கமல் - தனுஷ் இரங்கல்