‘லட்சுமி’ மற்றும் ‘மா’ குறும்படங்களின் இயக்குநர் கே.எம்.சர்ஜுன், நயன்தாராவை வைத்து ‘ஐரா' என்ற படத்தை இயக்கியுள்ளார். இந்தப் படத்தில், முதன்முறையாக இரண்டு வேடங்களில் நடித்துள்ளார் நயன்தாரா. அவருடன் இணைந்து கலையரசன், யோகி பாபு ஆகியோர் முக்கியக் கதாபாத்திரங்களில் நடித்துள்ளனர்.
இப்படத்தை கேஜேஆர் ஸ்டுடியோஸ் தயரித்துள்ளது. சுதர்சன் சீனிவாசன் ஒளிப்பதிவு செய்துள்ள இந்தப் படத்திற்கு கே.எஸ்.சுந்தர மூர்த்தி இசையமைத்துள்ளார். கதை மற்றும் திரைக்கதையை பிரியங்கா ரவீந்திரன் எழுதியுள்ளார். தற்போது படக்குழு ஐரா டிரைலரை வெளியிட்டுள்ளது.
ஏற்கனவே நயன்தாரா நடிப்பில் கதைக்கு முக்கியத்துவம் கொடுத்து வெளியான 'அறம்' படத்தில், துணிச்சலான ஆட்சியர் வேடத்தில் நடித்து அசத்தியிருந்தார்.
இந்த படத்தை தொடந்து, இமைக்கா நொடிகள் படத்தில், சிபிஐ அதிகாரியாக நடித்திருந்தார். இந்நிலையில் 'ஐரா' படத்தில் முதல் முறையாக ‘யமுனா’ என்ற துணிச்சல் மிகுந்த பத்திரிகையாளராகவும், ‘பவானி’ என்ற வெகுளிப் பெண்ணாகவும் நயன்தாரா நடித்துள்ளார். திரையில் நயன்தாரா முதன்முறையாக இரட்டை வேடத்தில் நடித்துள்ளதால் இப்படத்தை ரசிகர்கள் பெரும் ஆவலுடன் எதிர்பார்த்துக் கொண்டிருக்கின்றனர்.
தணிக்கை குழு இப்படத்திற்கு ‘யு/ஏ’ சான்றிதழ் அளித்துள்ளனர். மார்ச் 28-ம் தேதி இப்படம் வெளியாகவுள்ளது. அழுத்தமான கதாபாத்திரங்களை தேர்வுசெய்து நடித்துவரும் நயன்தாராவிற்கு இந்தத் திரைப்படம் மேலும் வலு சேர்க்கும் என எதிர்பார்க்கப்படுகிறது.
