'கோப்ரா'வை முந்தும் 'சீயான் 60' - தலையசைப்பாரா தயாரிப்பாளர்...?

கார்த்திக் சுப்புராஜ் இயக்கத்தில், உருவாகி வரும் 'சீயான் 60' படத்தை முதலில் வெளியிட நடிகர் விக்ரம் முடிவு செய்துள்ளார்.

விக்ரம் நடிப்பில் 'கோப்ரா', 'சீயான் 60' ஆகிய படங்கள் தயாரிப்பில் உள்ளன. இதில் அஜய் ஞானமுத்து இயக்கத்தில் உருவாகி வரும் 'கோப்ரா', நீண்ட நாட்களாகத் தயாரிப்பில் உள்ளது. கரோனா அச்சுறுத்தலால் படப்பிடிப்பு முடியவில்லை. மேலும், கிராபிக்ஸ் காட்சிகளுக்கான பணிகளும் நிறைவு பெறவில்லை.

இந்தப் படத்துக்குப் பிறகு கார்த்திக் சுப்புராஜ் இயக்கத்தில் விக்ரம், துருவ் விக்ரம், சிம்ரன், வாணி போஜன் உள்ளிட்ட பலர் நடிப்பில் உருவாகி வரும் படம் 'சீயான் 60'. இன்னும் பெயரிடப்படாத இந்தப் படத்தின் படப்பிடிப்பு சுமார் 50 விழுக்காடு முடிவடைந்துவிட்டது.

இதில் கிராபிக்ஸ் காட்சிகளும் குறைவு என்பதால், ஜூலையில் 'சீயான் 60' படத்தைத் தொடங்கி முடிக்க விக்ரம் திட்டமிட்டுள்ளார். ஒரே கட்டமாக 'சீயான் 60' படத்தை முடித்துவிட்டு, பின்பு 'கோப்ரா' படத்தைத் தொடங்க முடிவு செய்யப்பட்டுள்ளதாக தகவல்கள் தெரிவிக்கின்றன. இந்த இரண்டு படங்களையுமே லலித் குமாரே தயாரித்து வருவதால் இதில் எந்தவொரு சிக்கலும் இருக்காது என்று விக்ரம் நம்பிக்கை வைத்துள்ளதாக தகவல் வெளியாகியுள்ளது.