சமூக இடைவெளியில் மாஸ்டர் குழுவினர் - மாளவிகா மோகனின் வீடியோ சாட் ட்வீட்

சென்னை: மாஸ்டர் படக்குழுவினர் சமூக இடைவெளியைக் கடைபிடிப்பது போல், நீங்களும் கடைபிடிக்கிறீர்களா என்று கேள்வி எழுப்பி ட்வீட் செய்துள்ளார் நடிகை மாளவிகா மோகனன்.

சமூக இடைவெளியை முன்னிருத்தும் விதமாக நடிகர் விஜய் உள்ளிட்ட மாஸ்டர் குழுவினர்களோடு வீடியோ கால் மூலம் பேசியுள்ளார் நடிகை மாளவிகா மோகனன்.

கரோனா தொற்று பரவாமல் தற்காத்துக்கொள்வதற்கு சமூக இடைவெளி என்பது மிகவும் முக்கியமானது என்ற கருத்து முன்வைக்கப்படுகிறது.

இதையடுத்து, நடிகர் விஜய், இசையமைப்பாளர் அனிருத், மாஸ்டர் படத்தின் இணைத் தயாரிப்பாளர் ஜெகதீஷ் ஆகியோருடன் வீடியோ கால் பேசியுள்ள படத்தின் கதாநாயகி மாளவிகா மோகனன், "மாஸ்டர் குழுவினர் சமூக இடைவெளியை கடைபிடிக்கின்றனர். நீங்கள் செய்கிறீர்களா?" என்று கேள்வி எழுப்பியுள்ளார்.

இது தொடர்பாக 'மாஸ்டர்' படத்தின் 'குட்டி ஸ்டோரி' பாடல் வரி ரெபரன்ஸுடன், வீடியோ சாட் செய்த புகைப்படத்தை தனது ட்விட்டரில் பகிர்ந்து, "வெளியே சந்தித்து பேச முடியாமல் போனால், எங்களது சந்திப்பு இப்படித்தான் இருக்கும்" என்று குறிப்பிட்டுள்ளார்.

தளபதி விஜய், விஜய் சேதுபதி, மாளவிகா மோகனன், சாந்தனு, கெளர கிஷான், ஆண்ட்ரியா உள்ளிட்ட பலர் நடித்துள்ள மாஸ்டர் திரைப்படம் ரசிகர்கள் மத்தியில் பெரிய எதிர்பார்ப்பை ஏற்படுத்தியுள்ளது.

படத்துக்கு அனிருத் இசையமைத்துள்ளார். 'கைதி' படப்புகழ் லோகேஷ் கனகராஜ் இயக்கியுள்ளார். படத்தின் இசை வெளியீடு கடந்த 15ஆம் தேதி கோலாகலமாக நடைபெற்றது.

இதையடுத்து படத்தின் ட்ரெய்லர் மார்ச் 23ஆம் தேதி வெளியாகும் என அறிவிக்கப்பட்டிருந்தது. தற்போது கரோனா தொற்று பாதிப்பால் நாடே முடங்கிப்போயுள்ள நிலையில், ட்ரெய்லர் ரிலீஸை படக்குழுவினர் தள்ளி வைத்துள்ளனர்.

மேலும், படமும் ஏப்ரல் மாதம் ரிலீஸாவதாக இருந்த நிலையில், தற்போது தள்ளிப்போயுள்ளது.