சுதா கொங்கரா இயக்கத்தில் சூர்யா நடிப்பில் உருவாகியுள்ள திரைப்படம் 'சூரரைப் போற்று'. இதில் அபர்ணா பாலமுரளி, ஊர்வசி, காளிவெங்கட், கருணாஸ் உள்ளிட்ட பலர் நடித்துள்ளனர்.
ஏர் டெக்கான் என்ற பெயரில் குறைந்த கட்டணத்தில் விமான சேவையை தொடங்கிய கேப்டன் ஜி.ஆர். கோபிநாத்தின் வாழ்க்கையை அடிப்படையாக வைத்து உருவாகியுள்ள இப்படத்தில் அவரது வாழ்க்கையில் எதிர்கொண்ட போராட்டங்களை மையமாக வைத்து கதை அமைக்கப்பட்டது. அமேசான் பிரைமில் தீபாவளி வெளியீடாக கடந்தாண்டு நவம்பர் 12ஆம் தேதி வெளியானது.
'சூரரைப் போற்று’ திரைப்படம் வெளியாவதற்கு முன்பே ரூ. 100 கோடிக்கும் மேல் ப்ரீ பிசினஸ் செய்து ரூ. 100 கோடி கிளப்பில் இணைந்தது. அதுமட்டுமின்றி இந்தாண்டு நடைபெறும் ஆஸ்கர் விருது விழாவில் பொதுப் பிரிவில் தேர்வானது. ஓடிடி தளத்தில் 50 மில்லியன் பேர் பார்த்த படம் என்ற சாதனையை 'சூரரைப் போற்று' பெற்றது.
அதுமட்டுமல்லாது ஐஎம்டிபி (IMDb) இணையதளத்தில் உலக அளவில் சிறந்த படமாக மூன்றாவது இடத்தில் உள்ளது. இப்படி சூரரைப் போற்று வெளியான நாள் முதல் பல சாதனைகளை படைத்து வருகிறது.