வெங்கட்பிரபு இயக்கத்தில் சிம்பு நடிப்பில் உருவாகிவரும் படம் 'மாநாடு'. சுரேஷ் காமாட்சி தயாரிக்கும் இப்படத்தில் எஸ்.ஜே. சூர்யா, எஸ்.ஏ. சந்திரசேகர், கல்யாணி பிரியதர்ஷன், கருணாகரன், பிரேம்ஜி உள்ளிட்டோர் நடித்துள்ளனர்.
படத்திற்கு யுவன் சங்கர் ராஜா இசையமைத்துள்ளார். நீண்ட நாள்களாகக் கிடப்பில் போடப்பட்ட இப்படத்தின் படப்பிடிப்புத் தொடர்ந்து நடைபெற்றுவருவதால், ரசிகர்கள் படத்தின் மீது பெரும் எதிர்பார்ப்பில் உள்ளனர்.
சிம்புவின் பிறந்த நாளான பிப்ரவரி 3ஆம் தேதி படக்குழுவினர் 'மாநாடு' படத்தின் டீஸரை வெளியிட்டனர். இந்த டீஸருக்கு நல்ல வரவேற்பு கிடைத்தது. இந்தப் படத்தின் இறுதிகட்டப் படப்பிடிப்பு பிரமாண்ட அரங்கு அமைக்கப்பட்டு நடைபெற்றது. பல பிரச்னைகளுக்கு மத்தியில் தொடங்கிய, இந்தப் படத்தின் படப்பிடிப்பு ஒரு வழியாக சமீபத்தில் நிறைவுற்றது. அதனைத் தொடர்ந்து மாநாடு படக்குழுவினர் டப்பிங், இசைக்கோர்ப்பு உள்ளிட்ட இறுதிக்கட்டப் பணிகளில் ஈடுபட்டு வருகின்றனர்.
இந்த நிலையில், ரம்ஜான் வெளியீடாக 'மாநாடு' படத்தின் ஃபர்ஸ்ட் சிங்கிள் வெளியிடப்படும் எனப் படத்தின் தயாரிப்பாளர் சுரேஷ் காமாட்சி தனது ட்விட்டர் பக்கத்தில் அறிவித்திருந்தார். இந்த ட்வீட்டால் ஆர்வமுடன் காத்திருந்த ரசிகர்கள், ரம்ஜான் அன்று பாடல் வெளியாகாததால் மிகுந்த ஏமாற்றம் அடைந்தனர். அதுமட்டுமல்லாது சுரேஷ் காமாட்சியிடம் பாடல் குறித்தான அப்டேட் கேட்டு சமூக வலைத்தளத்தில் கேள்வியெழுப்பி வந்தனர்.
இதற்கு பதில் அளிக்கும் விதமாக சுரேஷ் காமாட்சி தனது ட்விட்டர் பக்கத்தில், "பேரிடர் காலத்தில் தினமும் ஏதாவது இழப்புச் செய்தி காதில் விழுந்துகொண்டேயிருக்கிறது. யாரும் கொண்டாட்ட மனநிலையில் இல்லை. மருத்துவமனை வாசலிலும்.. கரோனா பயத்திலும் இருக்கும் இச்சூழலில் இரக்கமற்று 'மாநாடு' படத்தின் சிங்கிளை வெளியிடுவது மனிதமற்ற செயலாக இருக்கும்.
பொது முடக்கம் முடியட்டும். கொஞ்சமாவது மக்கள் இயல்பு நிலைக்குத் திரும்பட்டும். நண்பர்களே அதுவரைக்கும் மற்றவர்களுக்காக வேண்டியபடி காத்திருங்கள். நன்றி" என ட்வீட் செய்துள்ளார்.
இதையும் படிங்க: விறுவிறுப்பாக நகரும் மாநாடு பட வேலைகள்
