சென்னை:பிரபல யூ-ட்யூபர் (YouTuber) விஜய் குமார் ராஜேந்திரன் (எரும சாணி புகழ்) இயக்கத்தில் அருள்நிதி நடித்துள்ள படம் 'டி பிளாக்' (D Block). இதில் அருள்நிதிக்கு ஜோடியாக அறிமுக நாயகி அவந்திகா மிஸ்ரா நடிக்கிறார்.
மேலும் இவர்களுடன் உமா ரியாஸ், 'தலைவாசல்' விஜய், கரு. பழனியப்பன் உள்ளிட்ட பலர் நடிக்கின்றனர். அதுமட்டுமல்லாது இயக்குநர் விஜய் குமார் இப்படத்தில் அருள்நிதியின் நண்பனாகவும் நடித்துள்ளார்.
'டி பிளாக்' படத்தை எம்.என்.எம். ஃபிலிம்ஸ் சார்பாக அரவிந்த் சிங் தயாரிக்கிறார்.
சக்தி ஃபிலிம் பேக்டரி நிறுவனம் சார்பில், சக்திவேல் திரை வெளியிட்டு உரிமையைக் கைப்பற்றியுள்ளார். அருள்நிதியின் பிறந்தநாளான இன்று (ஜூலை 21) இப்படத்தின் ஃபர்ஸ்ட் லுக் போஸ்டரை இயக்குநர் பாண்டிராஜ் தனது சமூக வலைதளப்பக்கத்தில் வெளியிட்டுள்ளார்.
'டி பிளாக்' படம் குறித்து இயக்குநர் விஜய் குமார் கூறுகையில், "இத்திரைப்படத்தின் ஒவ்வொரு கட்டமும், நேர்மறையான அதிர்வுகளைப் பெற்றுவருவதால் எங்கள் முழுக் குழுவினரும் பெரும் உற்சாகத்தில் திளைத்துவருகின்றனர்.
அருள்நிதியுடன் படப்பிடிப்பில் இணைந்து நடித்தது மிகச் சிறந்த அனுபவமாக இருந்தது. அருள்நிதி தனது பாத்திரத்திற்காக மிகக் கடினமான முயற்சிகளை மேற்கொண்டார். இப்படத்தில் ஒரு கல்லூரி மாணவரின் பாத்திரத்தில் நடிப்பதால், அவர் ஏழு கிலோவைக் குறைத்து மிக அழகான இளமையான தோற்றத்திற்கு மாறினார்.
இப்படத்தின் ஃபர்ஸ்ட் லுக் போஸ்டரை இயக்குநர் பாண்டிராஜ் வெளியிட்டது மகிழ்ச்சி அளிக்கிறது. விரைவில் படத்தின் டீசர், ட்ரெய்லர், இசை வெளியீடு உள்ளிட்ட தேதி குறித்தான அறிவிப்புகளை விரைவில் அறிவிப்போம்" என்றார்.
இதையும் படிங்க: பரபரப்பான புலனாய்வுத் திரில்லராக உருவாகும் அருள்நிதியின் 'டைரி'
