நாகூரில் பிறந்த இஸ்மாயில் முகமது ஹனிபா பின்னாட்களில் நாகூர் ஹனிபா என்று அழைக்கப்பட்டார். குடும்ப வறுமை காரணமாக பாட்டு பாடி சம்பாதிக்க வேண்டிய சூழலுக்கு தள்ளப்பட்ட நாகூர் ஹனிபா, தனது முதல் கச்சேரியை 13 வயதில் நடத்தினார், அதுவும் மாட்டு வண்டியின் மீது... பின்னர் திருமண வீடு, தர்கா, இஸ்லாமிய துறவிகளின் கல்லறை என பல இடங்களில் ஹனிபாவின் குரல் ஒலிக்கத் தொடங்கியது. அப்போது ஹனிபாவுக்கு போட்டிகள் இல்லை, ஒரே மாதத்தில் 50 கச்சேரிகள் அவர் குரலில் அரங்கேறும்...
இஸ்லாமியரான ஹனிபா, திராவிட கொள்கைகள் மீது ஏற்பட்ட ஈர்ப்பின் காரணமாக பெரியாருடன் பயணிக்கத் தொடங்கினர். பின்னர் கருணாநிதியின் நட்பும், அண்ணாவின் பழக்கமும் அவரை திமுகவின் பக்கம் அழைத்து வந்தது. பெரியார் நாகப்பட்டினம் சென்றால் ஹனிபாவின் குரலைக் கேட்காமல் திரும்பமாட்டாராம், ஹனிபாவை பாடச் சொல்லி கேட்டுவிட்டு ‘உனக்கு மைக்கே தேவையில்லை’ என்பாராம்...
ஆரம்ப காலங்களில் இவர் திருமண இல்லங்கள் மற்றும் பிற இடங்களில் பாடிய பாடல்கள் பதிவு செய்யப்படவில்லை. அப்போதெல்லாம் பிரபலமான இந்தி பாடல்களின் இசையை எடுத்து, அதற்கேற்ப தமிழ் வரிகளை எழுதிப் பாடுவது வழக்கம். இசைக்கு உரிமைகோரும் பிரச்னை இல்லாத காலமது, ஹனிபா குரலில் உருவான பல பாடல்களை அப்போது பதிவு செய்ய முடியாதது நம் துரதிருஷ்டம்.
ஹனிபாவின் கச்சேரி இல்லாத திமுக மேடைகளே இருக்காது. அவர் பாடி முடித்தபின்தான் திமுக கூட்டங்கள் தொடங்கும். ஓடி வருகிறான் உதயசூரியன், கல்லக்குடி கொண்ட கருணாநிதி வாழ்கவே, நீ எங்கே சென்றாய் அண்ணா, அழைக்கிறார் அண்ணா ஆகிய பாடல்களை இன்று கேட்டாலும் திராவிட உடன்பிறப்புகளுக்கு மெய் சிலிர்க்காமல் இல்லை.
‘இந்தியா எங்கள் தாய் நாடு
இஸ்லாம் எங்கள் வழிபாடு
தமிழே எங்கள் மொழியாகும்
தன்மானம் எங்கள் உயிராகும்
யாரடா சொன்னது நம்மை அந்நியன் என்று யாரடா சொன்னது’ ... ஹனிபா குரலில் உருவான இந்தப் பாடல் இந்திய சுதந்திர போராட்டத்தில் இஸ்லாமிய சகோதரர்களின் பங்களிப்பு குறித்து பேசுகிறது.