'டான்' பட வசனத்தைப் பேசி அசத்திய அமேசான் சிஇஓ

மும்பையில் நடைபெற்ற பாலிவுட் நிகழ்ச்சியில் பங்கேற்ற அமேசான் நிறுவனத்தின் தலைமை செயல் அலுவலர் ஜெஃப் பெஸோஸ் ஷாருக்கான் நடித்த டான் படத்தின் வசனத்தைப் பேசி அசத்தியுள்ளார்.

மும்பையில் பாலிவுட் நட்சத்திரங்கள் பங்கேற்ற நிகழ்ச்சியில் சிறப்பு விருந்தினராக அமேசான் நிறுவனத்தின் தலைமை செயல் அலுவலர் ஜெஃப் பெஸோஸ் கலந்து கொண்டார்.

இந்த நிகழ்வில் ஷாருக்கான், சோயா அக்தர், கமல்ஹாசன், ரித்தீஷ் தேஷ்முக், ஜெனிலியா, வித்யா பாலன், பங்கஜ் திரிபாதி, அலி ஃபசல் உள்ளிட்ட பலர் பங்கேற்றனர்.

விழா மேடையில் அமேசான் தலைமை செயல் அலுவலர் ஜெஃப் பெஸோஸ் உடன் கலந்துரையாடிய ஷாருக்கான், தான் நடித்த டான் திரைப்படத்தில் இடம்பெற்ற வசனம் ஒன்றைப் பேசி அதனை ஜெஃப் பெஸோஸையும் பேச வைத்தார்.

இந்த நிகழ்வையும் தொகுத்து வழங்கிய ஷாருக்கான் ஜெஃப் பெஸோஸ் உடன் கலகலப்பாக உரையாற்றி விழா அரங்கில் இருந்தவர்களை சிரிப்பலையில் முழ்க வைத்தார்.

ஷாருக்கான் மற்றும் ஜெஃப் பெஸோஸ் கலந்துரையாடும் காணொலியை நடிகர் ரித்தீஷ் தேஷ்முக் தனது ட்விட்டர் பக்கத்தில் பகிர்ந்துள்ளார். இந்த காணொலி தற்போது இணையத்தில் வேகமாகப் பரவி வருகிறது.