மும்பை: கபில்தேவ் ஆடிய பிரபல நடராஜர் ஷாட் புகைப்படத்தை நடிகர் ரன்வீர் சிங் தனது "83" படத்திற்காக அவரின் ட்வீட்டரில் வெளியிட்டுள்ளார்.
1983ஆம் ஆண்டு இங்கிலாந்தில் நடைபெற்ற புரொண்டன்ஷியல் உலகக் கோப்பையை கபில் தேவ் தலைமையிலான இந்திய அணி முதல் முறையாக வென்று சாதனை படைத்தது.
அந்த உலகக் கோப்பையில் கபில்தேவ் அண்ட் கோ மேற்கொண்ட பயணத்தை அடிப்படையாக வைத்து "83" என்ற பெயரில் படம் உருவாகி வருகிறது. இந்தியில் தயாராகி வரும் இந்தப் படம் தமிழ், தெலுங்கு மொழிகளிலும் வெளியாக உள்ளது. படத்தில் கபில்தேவாக ரன்வீர் சிங்கும், அவரது மனைவி ரோமி தேவாக தீபிகா படுகோனேவும் நடிக்கிறார்கள்.
கோலிவுட் நடிகர் ஜீவா, தமிழக வீரர் கிருஷ்ணமாச்சாரி ஸ்ரீகாந்த் வேடத்தில் நடிக்கிறார். மேலும், பார்வதி நாயர், போமன் இரானி உள்ளிட்ட பலரும் நடிக்கிறார்கள். படத்தின் படப்பிடிப்பு முடிவடைந்த நிலையில், இதர தயாரிப்பு பணிகள் விறுவிறுப்பாக நடைபெற்றுக்கொண்டிருக்கிறது.