முன்னாள் நாடாளுமன்ற உறுப்பினர் ஹேம மாலினி, அவரது மகள் இஷா தியோல் இருவரும் நடித்து சமீபத்தில் வெளிவந்த கெண்ட் ஆர் ஓ குடிநீர் சுத்திகரிப்பு இயந்திரத்தின் விளம்பரப்படம் சமூக வலைதளங்களிலும், பல தரப்பட்ட மக்களிடையே கடும் விமர்சனங்களைப் பெற்றது.
வீட்டு வேலை செய்யும் பெண்கள் கைகளால் மாவை பிசையும்போது கிருமிதொற்றுக்கு ஆளாகலாம் எனக் குறிப்பிட்டு, கைகளைத் தவிர்த்து தங்கள் நிறுவன இயந்திரத்தை உபயோகிக்கக் கோரி அந்த விளம்பரம் அமைந்திருந்தது,
வர்க்க வேறுபாட்டைத் தூக்கிப் பிடிக்கும் வகையிலும், பெண் அடிமைத்தனத்தை ஊக்குவிக்கும் வகையிலும் இந்த விளம்பரம் அமைந்திருந்ததை அடுத்து, சமூக வலைதளங்களில் கடுமையான விமர்சங்களை இவ்விளம்பரம் பெற்றுவந்தது.
இதனையடுத்து கெண்ட் நிறுவனத்தின் தலைவரும், நிர்வாக இயக்குநருமான மகேஷ் குப்தா முன்னதாக வெளிப்படையாக மன்னிப்பு கோரி இருந்தார். தொடர்ந்து இவ்விளம்பரத்தின் ஒளிபரப்பு நிறுத்தப்பட்டது.
இந்நிலையில், கெண்ட் நிறுவனத்தின் நீண்டகால விளம்பரத் தூதராக இருந்துவரும் நடிகையும், முன்னாள் நாடாளுமன்ற உறுப்பினருமான நடிகை ஹேம மாலினி கடுமையான விமர்சனங்களை இவ்விளம்பரத்திற்காகப் பெற்றுவந்த நிலையில், தற்போது அவரது ட்விட்டர் பக்கத்தில் இது குறித்து விளக்கம் அளித்துள்ளார்
”இந்த விளம்பரத்தில் வெளிப்படுத்தப்பட்ட கருத்துகள் என் எண்ணங்களுக்கு எதிரானவை. நிறுவனத்தின் தலைவர் ஏற்கனவே பொது மன்னிப்பு கோரிவிட்டார். நான் சமூகத்தின் அனைத்து வர்க்க மக்களுடனும் துணை நிற்கிறேன் என்பதை இங்கே பதிவுசெய்ய விரும்புகிறேன்” எனப் பதிவிட்டுள்ளார்
கெண்ட் நிறுவனம் ஆர் ஓ குடிநீர் சுத்திகரிப்பு இயந்திரம் தவிர்த்து, காற்று சுத்திகரிப்பு இயந்திரம், சமையல் உபகரணங்கள், வேக்யூம் க்ளீனர்கள் உள்ளிட்டவற்றையும் தயாரித்து வருவது குறிப்பிடத்தக்கது.
இதையும் படிங்க :சுத்தம் என்பது நமக்கு! சுத்தம் உள்ள நாடாளுமன்றம்தான்! - ஹேமமாலினி புதிய அவதார்
