மும்பை: ரித்திக் ரோஷன் - டைகர் ஷேராஃப் நடிப்பில் ஆக்ஷன் த்ரில்லர் படமாக உருவாகியிருக்கும் 'வார்' டிரெய்லரை படக்குழுவினர் வெளியிட்டுள்ளனர்.
இந்தப் படத்தில் கதாநாயகியாக வாணி கபூர் நடித்துள்ளார். அசுடோஷ் ராணா, திப்பன்னிதா ஷர்மா, அனுபிரியா கோயங்கா உள்ளிட்டோர் முக்கிய கதாபாத்திரங்களில் நடித்துள்ளனர்.
அஞ்சானா அஞ்சானி, பேங் பேங் உள்ளிட்ட வெற்றிப் படங்களை இயக்கிய சித்தார்த் ஆனந்த் படத்தை இயக்கியுள்ளார். படத்துக்கு இசை விஷால் - சேகர். ஒளிப்பதிவு - பெஞ்சமின் ஜாஸ்பர். தயாரிப்பு - யஷ் ராஜ் பிலிம்ஸ் சார்பில் ஆதித்யா சோப்ரா.
குரு - சிஷ்யன் ஆகிய இருவருக்கும் இடையே நடைபெறும் சண்டையை அடிப்படையாகக் கொண்டு 'வார்' படத்தின் கதை அமைந்துள்ளது. இந்தப் படத்துக்கு முன்னதாக 'ஃபைட்டர்ஸ்' என்று பெயர் வைக்கப்பட்டிருந்த நிலையில், பின்னர் 'வார்' என மாற்றினர்.
இந்தப் படம் தமிழ், தெலுங்கு ஆகிய மொழிகளிலும் டப் செய்யப்பட்டு ரிலீஸ் செய்யப்படவுள்ளது. குளிர்ச்சியான கண்களுக்கு விருந்தாக ஃபாரின் லொக்கேஷன்கள், அதிரடியான சண்டைக் காட்சிகள், கிளாமர் என முற்றிலும் கமர்ஷியல் பாணியில் உருவாகியிருக்கும் 'வார்' திரைப்படம் காந்தி ஜெயந்தி வெளியீடாக அக்டோபர் 2ஆம் தேதி திரைக்கு வருகிறது.
இதனிடையே தற்போது படத்தின் டிரெய்லரை படக்குழுவினர் வெளியிட்டுள்ளனர்.
