உணர்ச்சிப்பூர்வமான ரோலர் கோஸ்டர் 'தில் பேச்சாரா' - நடிகை ப்ரீத்தி ஜிந்தா

மும்பை: சுஷாந்த் சிங் நடிப்பில் கடைசியாக வெளியான 'தில் பேச்சாரா' திரைப்படத்தைப் பார்த்து நடிகை ப்ரீத்தி ஜிந்தா உணர்ச்சிப்பூர்வமான பதிவை, தனது சமூக வலைதளப் பக்கத்தில் வெளியிட்டுள்ளார்.

மறைந்த பாலிவுட் இளம் நடிகர் சுஷாந்த் சிங் நடிப்பில் கடைசியாக உருவான படம் 'தில் பேச்சாரா'. முகேஷ் சோப்ரா இயக்கியுள்ள இப்படம் 'தி ஃபால்ட் இன் அவர் ஸ்டார்ஸ்' என்னும் பிரபல ஆங்கில நாவலைத் தழுவி எடுக்கப்பட்டுள்ளது. இப்படத்தில் சுஷாந்த் சிங்குக்கு ஜோடியாக சஞ்சனா நடித்துள்ளார். இதற்கு ஏ.ஆர். ரஹ்மான் இசையமைத்துள்ளார்.

ஃபாக்ஸ் ஸ்டார் ஸ்டுடியோஸ் தயாரிப்பில் உருவாகியுள்ள இப்படம், ஜூலை 24ஆம் தேதி டிஸ்னி + ஹாட் ஸ்டாரில் வெளியாகி ரசிகர்கள் மத்தியில் நல்ல வரவேற்பைப் பெற்று வருகிறது.

இப்படத்தைப் பார்த்த நடிகை ப்ரீத்தி ஜிந்தா தனது இன்ஸ்டாகிராம் பக்கத்தில், சுஷாந்த் சிங் தனது கடைசிப் படத்தில் மிக அருமையான முறையில் முழுமையாக நடித்துள்ளார். இப்படம் ஒரு உணர்ச்சிப்பூர்வமான ரோலர் கோஸ்டர். சஞ்சனா நடிப்பு மிகவும் அற்புதமானது. படக்குழுவினர் அனைவருக்கும் எனது மனமார்ந்த வாழ்த்துக்கள் எனக் குறிப்பிட்டுள்ளார்.