'லுடோ', 'பா 2' படங்களைத் தொடர்ந்து பாலிவுட் நடிகர் அபிஷேக் பச்சன் அறிமுக இயக்குநர் தியா அன்னபூர்ணா கோஷ் இயக்கும் 'போப் பிஸ்வாஸ்' என்ற படத்தில் நடிக்க ஒப்பந்தம் செய்யப்பட்டுள்ளார்.
'கஹானி' படத்தின் இயக்குநர் சுஜோய் கோஷின் மகளான தியா அன்னபூர்ணா கோஷ், இந்தப் படத்தை 'கஹானி' படத்தில் இடம்பெற்ற போப் பிஸ்வாஸ் என்ற கதாபாத்திரத்தைக் கொண்டு உருவாக்கியிருக்கிறார்.
வித்யா பாலன், பரம்பரதா சாட்டர்ஜி, நவாசுதீன் சித்திக், சஸ்வதா சாட்டர்ஜி உள்ளிட்டோர் நடிப்பில் 2012ஆம் ஆண்டு வெளியாகி 'கஹானி' படம் வசூல் சாதனைப் படைத்தது. அதில் இடம்பெற்ற சஸ்வதா சாட்டர்ஜியின் போப் பிஸ்வாஸ் என்ற கதாபாத்திரம் அந்தப் படத்தில் மிகவும் பேசப்பட்ட ஒன்றாகும்.
தற்போது கிரைம் திரில்லர் கதைக்களத்தில் உருவாகும் 'போப் பிஸ்வாஸ்' படத்தை ஷாருக்கானின் ரெட் சில்லீஸ் என்டர்டெய்ன்மென்ட் நிறுவனம், பவுண்ட் ஸ்கிரிப்ட் மோஷன் பிக்சர்ஸ் நிறுவனங்கள் தயாரிக்கின்றன. பாலிவுட் நடிகை சித்ரங்கதா சிங் முக்கியக் கதாபாத்திரத்தில் நடிக்கிறார்.