மும்பை (மகாராஷ்டிரா): ஜூலை மாதம் ரயிலில் தனது மூத்த அதிகாாி மற்றும் மூன்று பயணிகளை சுட்டுக் கொன்ற ரயில்வே (RPF) கான்ஸ்டபிள் சேத்தன் சிங் சவுத்ரி, பணியிலிருந்து நீக்கம் செய்யப்பட்டுள்ளார். ரயில்வே மூத்த அதிகாரியின் கூற்றுப்படி, 2017ல் ஒரு முஸ்லீம் நபரைத் துன்புறுத்தியது உட்பட இதுவரை மூன்றுக்கு மேற்பட்ட ஒழுக்கம் தொடர்பான சம்பவங்களில் சேத்தன் சிங் சவுத்ரி ஈடுபட்டுள்ளார், மேலும் அவரை பணிநீக்கம் செய்வதற்கான உத்தரவு ஆகஸ்ட் 14ஆம் தேதி அன்று ரயில்வே பாதுகாப்புப் படை (RPF) மூலம் வெளியிடப்பட்டுள்ளது.
2017ஆம் ஆண்டு மத்தியப் பிரதேசத்தின் உஜ்ஜயினியில் முஸ்லீம் நபரை எந்த காரணமும் இல்லாமல் துன்புறுத்தியது தொடர்பாக சவுத்ரிக்கு எதிராக விசாரணைக்கு மேலதிகாரிகள் உத்தரவிட்டுள்ளனா். குஜராத்தில் சவுத்ரி தன்னுடன் பணியிலிருந்த சக ஊழியரைத் தாக்கியதாகவும், மற்றொரு சம்பவத்தில் தன்னுடன் பணியிலிருந்த சக ஊழியரின் ஏடிஎம் கார்டைப் பயன்படுத்தி பணத்தை எடுத்துள்ளதும் தொியவந்துள்ளது. ரயில் கொலை சம்பவத்தின் அடிப்படையில் 34 வயதான சவுத்ரியை பணியில் இருந்து நீக்க முடிவு எடுக்கப்பட்டதாக ரயில்வே அதிகாரி தெரிவித்துள்ளார்.