காவிரியில் இரு சிறுவர்கள் மாயம்; உதவி பேராசிரியர் உள்பட 2 பேர் சடலமாக மீட்பு!

திருச்சி அருகே காவிரி ஆற்றில் மூழ்கிய கல்லூரி பேராசிரியர் உள்பட இருவரது உடல் மீட்கப்பட்டன.

திருச்சிராப்பள்ளி: காவிரி ஆற்றில் மூழ்கிய இருவரது உடல் மீட்கப்பட்ட நிலையில், மாயமான 2 சிறுவர்களை தேடும் பணி தீவிரமாக நடைபெற்றுவருகிறது.

திருச்சி மாவட்டம் முசிறி அந்தரபட்டி பகுதியைச் சேர்ந்தவர் ஜெயலட்சுமி. இவரது வீட்டிற்கு, தீபாவளி பண்டிகையை முன்னிட்டு கோயம்புத்தூர், கரூர் மாவட்டத்திலிருந்து உறவினர்கள் வந்துள்ளனர். அதில் கோவை தனியார் கல்லூரி உதவி பேராசிரியர் சரவணகுமார் (31), சிறுவர்கள் நித்திஷ்குமார் (15), மிதுனோஷ் (8), ரத்திஷ் (12) ஆகியோருடன் சேர்ந்து 9 பேர் முசிறி காவிரி ஆற்றிலுள்ள பரிசல் துறை பகுதியில் குளித்தனர்.

ஆற்றில் குளித்துக் கொண்டிருந்தபோது, எதிர்பாராதவிதமாக பேராசிரியர் சரவணகுமார் நீரில் இழுத்துச் செல்லப்பட்டார். அப்போது சிறுவர்கள் நிதிஷ்குமார், ரத்தீஷ், மிதுனேஷ் ஆகியோரும் ஆற்று நீரில் மாயமாகினர். தகவலறிந்த முசிறி தீயணைப்பு மீட்பு படை வீரர்களும், காவல் துறையினரும் காவிரி ஆற்றில் இறங்கி தேடத் தொடங்கினர்.

அப்போது சரவணகுமார் இறந்தநிலையில் மீட்கப்பட்டார். தொடர்ந்து மிதுனேஷ், ரத்திஷ், நிதிஷ்குமார் ஆகியோரை தேடியபோது, முசிறி கருமாரியம்மன் கோயில் தெருவைச் சேர்ந்த அசோக் குமார் என்பவரது மகன் பார்த்திபன் (12) என்ற சிறுவனின் உடல் கிடைத்தது.

தேடப்பட்ட சிறுவர்களின் உடல் கிடைக்காமல், வேறொரு சிறுவனின் சடலம் கண்டெடுக்கப்பட்டது அங்கிருந்தவர்களை அதிர்ச்சியில் ஆழ்த்தியது. தொடர்ந்து நடந்த தேடுதல் பணியில் நித்திஷ் குமார் உயிருடன் மீட்கப்பட்டார்.

தொடர்ந்து, மீட்புப்படையினர் மாயமான ரித்திஷ், மிதுனேஷ் ஆகிய இரண்டு சிறுவர்களைத் தேடி வருகின்றனர். இறந்து கல்லூரி உதவி பேராசிரியர் சரவணகுமாருக்கு மூன்று மாதங்களுக்கு முன்தான் திருமணம் நடந்துள்ளது என்பது குறிப்பிடத்தக்கது.