சாத்தான்குளம் வழக்கு: சிபிஐ மற்றும் தடயவியல் அலுவலர்கள் விசாரணை தீவிரம்!

தூத்துக்குடி: சாத்தான்குளம் காவல் நிலையத்தில் 10க்கும் மேற்பட்ட சிபிஐ மற்றும் தடயவியல் அலுவலர்கள் தீவிர விசாரணை மேற்கொண்டு வருகின்றனர்.

தூத்துக்குடி மாவட்டம் சாத்தான்குளத்தில் காவல்துறையினர் விசாரணைக்கு அழைத்துச் சென்று தந்தை, மகன் உயிரிழந்த சம்பவம் இந்தியா மட்டுமின்றி சர்வதேச அளவிலும் பெரும் தாக்கத்தை ஏற்படுத்தியது. இந்த வழக்கு தொடர்பாக முதற்கட்டமாக சிபிசிஐடி அலுவலர்கள் விசாரணை மேற்கொண்டு காவலர், தலைமை காவலர், உதவி ஆய்வாளர்கள் மற்றும் காவல் ஆய்வாளர் உட்பட 10 பேரை கைது செய்து மதுரை சிறையில் அடைத்தனர்.

தனைத்தொடர்ந்து இவ்வழக்கு சிபிஐக்கு மாற்றப்பட்டது. டெல்லி சிபிஐ அலுவலர் ஏடிஎஸ்பி விஜயகுமார் சுக்லா தலைமையிலான விசாரணை நடைபெற்றது. இந்நிலையில், உயர் நீதிமன்ற மதுரை கிளையில் கைது செய்யப்பட்ட காவலர் முருகன் மற்றும் உதவி ஆய்வாளர் பாலகிருஷ்ணன் பிணை கேட்டு மனுதாக்கல் செய்திருந்தனர்.

இந்த மனு தொடர்பாக உயர்நீதிமன்ற நீதிபதி சிபிஐ விசாரணை எந்த நிலையில் உள்ளது எப்போது இறுதி அறிக்கை தாக்கல் செய்யப்படும் என்று கேள்வி எழுப்பினார்.

இதனைத்தொடர்ந்து இம்மாத இறுதிக்குள் சிபிஐ தனது விரிவான அறிக்கையை தாக்கல் செய்ய வேண்டும் என்று உத்தரவிட்டிருந்தது. தற்போது ஐந்து வாகனங்களில் சுமார் 10க்கும் மேற்பட்ட சிபிஐ அலுவலர்கள் மற்றும் தடயவியல் துறை அலுவலர்கள் வருமானத் துறை அலுவலர்கள் என 17 நபர்கள் கொண்ட குழு தற்போது சாத்தான்குளம் காவல் நிலையத்தில் விசாரணை செய்து வருகின்றனர்.

சாத்தான்குளம் காவல் நிலைய நுழைவு வாயிலில் தடுப்பு அமைக்கப்பட்டு யாரும் உள்ளே செல்ல முடியாத வகையில் காவல்துறையினரால் கண்காணிக்கப்பட்டு வருகிறது. விசாரணையில் ஏற்கனவே சாட்சியளித்த காவலர் ரேவதி மற்றும் தலைமை காவலர் பியூலா ஆகியோர் உள்ளனர் என்பது குறிப்பிடத்தக்கது.

இதையும் படிங்க:சசிகலா குறித்த கேள்வி: எடப்பாடி சொன்னது இதுதான்...!