இருசக்கர வாகனத்தின் மீது கார் மோதி விபத்து; ஒருவர் உயிரிழப்பு, இருவர் படுகாயம்!

செங்கல்பட்டு: மதுராந்தகம் அருகேயுள்ள சென்னை - திருச்சி தேசிய நெடுஞ்சாலையில் இருசக்கர வாகனமும் காரும் நேருக்கு நேர் மோதிய விபத்தில் ஒருவர் உயிரிழந்த சம்பவம் அப்பகுதி மக்களிடையே சோகத்தை ஏற்படுத்தியுள்ளது.

செங்கல்பட்டு நத்தம் பகுதியை சேர்ந்தவர்கள் ஈசாக், திலகம், மாரியம்மாள். இவர்கள் மூன்று பேரும் அப்பகுதியில் உள்ள காலி மது பாட்டில்கள் சுத்தம் செய்யும் தனியார் நிறுவனத்தில் பணிபுரிந்து வருகின்றனர். இந்நிலையில் இவர்கள் வழக்கம் போல் பணிக்கு செல்ல இருசக்கர வாகனத்தில் சென்றுள்ளனர்.

அப்போது மதுராந்தகம் அருகேவுள்ள சென்னை-திருச்சி தேசிய நெடுஞ்சாலையை கடக்க முயற்சித்தபோது, சென்னை நோக்கி வந்த கார், இருசக்கர வாகனத்தின் மீது மோதியது. இதில் அவர்கள் மூவரும் தூக்கிவீசப்பட்டனர், ஈசாக் சம்பவ இடத்திலேயே உயிரிழந்தார்.

மேலும் அவருடன் வந்த திலகம், மாரியம்மாள் இருவரும் படுகாயங்களுடன் செங்கல்பட்டு அரசு மருத்துவமனையில் சிகிச்சைக்காக அனுமதிக்கப்பட்டுள்ளனர். பின் தகவலறிந்து சம்பவ இடத்திற்கு வந்த மதுராந்தகம் காவல்துறையினர், இறந்தவரின் உடலை மீட்டு, உடற்கூறாய்வுக்காக மருத்துவமனைக்கு அனுப்பி வைத்தனர். மேலும் இதுகுறித்து வழக்குப்பதிவு செய்த காவல்துறையினர்,விசாரணை மேற்கொண்டு வருகின்றனர்.