கார் மீது லாரி மோதிய விபத்தில் ஒருவர் கவலைக்கிடம்!

வேலூர்: ஆம்பூர் அருகே கார் மீது லாரி மோதிய விபத்தில் இரண்டு பேர் படுகாயம் அடைந்தனர். ஒருவர் உயிருக்கு ஆபத்தான நிலையில் மருத்துவமனையில் அனுமதிக்கப்பட்டு சிகிச்சை பெற்றுவருகிறார்.

வேலூர் மாவட்டம் ஆம்பூர் அருகே சான்றோர் குப்பம் பகுதியில் பெங்களூர் - சென்னை தேசிய நெடுஞ்சாலை உள்ளது. இச்சாலை வழியாக மைசூரிலிருந்து தேங்காய் ஏற்றிக்கொண்டு சென்னை நோக்கிச் சென்றுகொண்டிருந்த லாரி திடீரென ஆம்பூர் தேசிய நெடுஞ்சாலையைக் கடக்க முயன்றபோது, லாரி எதிர்பாரதவிதமாக கார் மீது மோதி விபத்துக்குள்ளானது.

அதில் கார் தூக்கி வீசப்பட்டு சாலையோரம் நின்று கொண்டிருந்த பாலன் என்பவர் மீது விழுந்து நொறுங்கியது. இதில் பாலன் பலத்த காயம் அடைந்தார். காரின் உள்ளே இருந்த இருவரை படுகாயங்களுடன் அப்பகுதி மக்கள் மீட்டு அவசர ஊர்தி மூலம் ஆம்பூர் அரசு மருத்துவமனைக்கு அனுப்பிவைத்தனர்.

இதில், பாலன் தலை, கை கால்களில் பலத்த காயம் ஏற்பட்டதால் உயிருக்கு ஆபத்தான நிலையில் வேலூர் மருத்துவமனையில் சிகிச்சைக்காக அனுமதிக்கப்பட்டுள்ளார்.

இதுகுறித்து ஆம்பூர் காவல் துறையினர் வழக்குப்பதிவு செய்து விசாரணை மேற்கொண்டு வருகின்றனர். மேலும் காரில் இருந்தவர்கள் சான்றோர் குப்பம் பகுதியைச் சேர்ந்த தயாளன், சரஸ்வதி என்பது விசாரணையில் தெரியவந்தது.

இதையும் படிங்க: ஓடும் ரயிலில் செல்போனை பறிக்க முயற்சி - கீழே விழுந்த அப்பாவி இளைஞர் உயிரிழப்பு