வங்கியிலிருந்து பணம் பெற்று ஏடிஎம்களில் நிரப்பும் தனியார் நிறுவனம் ஒன்ற வடபழனியில் இயங்கி வருகிறது. இந்த நிறுவனத்தைச் சேர்நத தேவராஜ், முரளி ஆகிய ஊழியர்கள், பிப்ரவரி 7ஆம் தேதி, ஒரு வேனில் ரூபாய் 35 லட்சம் பணத்தை எடுத்துக்கொண்டு ஏடிஎம்களில் நிரப்புவதற்கு சென்றுள்ளனர்.
அதன்படி, அப்பணத்தை வடபழனி விருகம்பாக்கம், வளசரவாக்கம், கம்பாக்கம், வளசரவாக்கம், காட்டுப்பாக்கம் ஆகிய பகுதியில் உள்ள பதிமூன்று ஏடிஎம்களில் நிரப்பிவிட்டு மீதமுள்ள 14 லட்சத்துடன் போரூர் காவல் நிலையம் அருகே உள்ள நூம்பல் மூவேந்தர் நகருக்கு மாலை 6 மணி அளவில் வந்துள்ளனர்.
பின்னர், அங்கிருந்த கனரா வங்கி ஏடிஎமில் 4 லட்சம் ரூபாயை நிரப்பிக் கொண்டிருந்தனர், அப்போது தலைக்கவசம் அணிந்த மர்ம நபர் ஒருவர் அந்த ஏடிஎம்மில் பணம் எடுக்க வாடிக்கையாளர் போல் நுழைந்துள்ளார்.
அப்போது, பணத்தை நிரப்பிக் கொண்டிருந்த தேவராஜிடம் மீதமுள்ள பத்து லட்ச ரூபாயைக் கொடுக்கும்படி மிரட்டியுள்ளார். அதற்கு தேவராஜ் பணத்தைத் தர மறுக்கவே, மறைத்து வைத்திருந்த சிறிய கோடாரி மூலம் தேவராஜைத் தாக்கியுள்ளார் அந்த மர்ம நபர். இதில், தேவராஜின் வலது கையில்காயம் ஏற்பட்டுள்ளது.
பிறகு, பணத்துடன் தப்பிக்க முற்பட்ட அந்த மர்ம நபரைத் தடுக்க முயன்ற சக ஊழியர் முரளியையும் அவர் தாக்கியுள்ளார். தொடர்ந்து, 10 லட்சம் பணத்துடன் இருசக்கர வாகனத்தில் தயாராய் காத்திருந்த மற்றொரு நபருடன் தப்பிச் சென்றார்.
இது குறித்து போரூர் காவல் துறையினருக்குத் தகவல் அளிக்கப்பட்டது. சம்பவ இடத்திற்கு வந்த போரூர் காவல்துறையினர், இது மதுரவாயில் காவல் நிலையத்துக்கு உட்பட்டது என்பதால் மதுரவாயில் காவல்துறையினருக்குத் தகவல் அளித்தனர்.
தகவலறிந்து சம்பவ இடத்திற்கு விரைந்து வந்த மதுரவாயில் காவல் துறையினர் வழக்குப் பதிந்து விசாரணை மேற்கொண்டனர். இது தொடர்பாக ஏடிஎம்மில் பொருத்தப்பட்டிருந்த சிசிடிவி கேமரா, ஏடிஎம் இயந்திரத்திலிருந்த சிசிடிவி கேமரா மற்றும் அருகே உள்ள கடைகள் கட்டடங்கள் ஆகியவற்றிலிருந்த சிசிடிவி கேமரா பதிவுகளைக் கைப்பற்றி விசாரணை மேற்கொண்டு வந்தனர்.
மேலும், கொள்ளை சம்பவம் நடைபெற்ற அந்த பகுதியில் உள்ள செல்போன் அழைப்புகளை, செல்போன் டவர் மூலமாக ஆய்வு மேற்கொண்டனர். கைப்பற்றப்பட்ட ஆதாரங்களைக் கொண்டு கொள்ளை சம்பவத்தில் ஈடுபட்டதாக அக்யோமாயோ, ஆமூ என்ற இரண்டு நைஜீரியா நாட்டு வாலிபர்களைக் கைது செய்தனர்.
இவர்களுக்கு உதவியதாகக் கல்லூரி மாணவி ஒருவரையும் காவல்துறையினர் கைது செய்துள்ளனர். இக்கொள்ளைச் சம்பவத்திற்கு மூளையாகச் செயல்பட்ட மற்றொரு நைஜீரியா வாலிபர் பெங்களூர் பகுதிகளில் பதுங்கி இருப்பதாக வந்த தகவலையடுத்து, அவரைத் தேட தனிப்படை காவல்துறையினர் பெங்களூரு மற்றும் மைசூருக்கு விரைந்துள்ளனர்.
