BRICS summit 2023: 15வது பிரிக்ஸ் உச்சி மாநாடு: தென்னாப்பிரிக்கா சென்றடைந்தார் பிரதமர் மோடி!

PM Modi arrived in Johannesburg: தென்னாப்பிரிக்காவின் ஜோகன்னஸ்பெர்க்கில் நடைபெறும் 15வது பிரிக்ஸ் உச்சி மாநாட்டில் கலந்து கொள்வதற்காக பிரதமர் மோடி தென்னாப்பிரிக்கா சென்றடைந்துள்ளார்.

ஜோகன்னஸ்பெர்க் (தென்னாப்பிரிக்கா): தென் ஆப்பிரிக்கா நாட்டில் நடைபெற உள்ள 15வது பிரிக்ஸ் உச்சி மாநாட்டில் கலந்து கொள்வதற்காக பிரதமர் நரேந்திர மோடி, ஜோகன்னஸ்பெர்க் சென்றடைந்து உள்ளார். தென் ஆப்பிரிக்கா அதிபர் சிறில் ராமபோஷாவின் அழைப்பின் பேரில், இன்று (ஆகஸ்ட் 22) முதல் நாளை மறுநாள் (ஆகஸ்ட் 24) வரை தென் ஆப்பிரிக்காவில் அரசு முறைப் பயணமாக பிரதமர் சுற்றுப் பயணம் மேற்கொண்டு உள்ளார்.

இந்த நிலையில், தென் ஆப்பிரிக்கா வந்தடைந்த பிரதமர் மோடிக்கு விமான நிலையத்தில் உற்சாக வரவேற்பு அளிக்கப்பட்டது. அது மட்டுமல்லாமல், அங்கு குழுமி இருந்த இந்திய சமூக மக்கள், பாரம்பரிய இசைக் கருவிகளை இசைத்து பிரதமர் மோடியை வரவேற்றனர்.

கடந்த 2019ஆம் ஆண்டு முதல் இந்தியா, தென் ஆப்பிரிக்கா, பிரேசில், ரஷ்யா, சீனா போன்ற நாடுகளை உள்ளடக்கிய பிரிக்ஸ் உச்சி மாநாட்டை தென் ஆப்பிரிக்கா நடத்தி வருகிறது. முன்னதாக டெல்லியில் இருந்து தென் ஆப்பிரிக்கா புறப்பட்ட பிரதமர் மோடி, “வளர்ச்சி மற்றும் சீர்திருத்த அமைப்புகளை கொண்ட தெற்கு பகுதிகளின் விவகாரங்களை விவாதிப்பதற்கு பிரிக்ஸ் ஒரு தளமாக இருக்கிறது என்பதை நாங்கள் மதிக்கிறோம். ஒத்துழைப்பு மற்றும் நிறுவன வளர்ச்சிகளின் மதிப்பீட்டு பகுதிகளை அடையாளம் காண்பதற்கு பிரிக்ஸ் உச்சி மாநாடு ஒரு பயன் உள்ள வாய்ப்பை அளிக்கும்” என தனது அறிக்கையில் குறிப்பிட்டு உள்ளார்.

மேலும், தனது ‘X' வலைதளப் பதிவில், “ஜோகன்னஸ்பெர்க்கில் நடைபெற்று வரும் பிரிக்ஸ் உச்சி மாநாட்டில் கலந்து கொள்வதற்காக தென் ஆப்பிரிக்காவுக்கு புறப்படுகிறேன். அது மட்டுமல்லாமல், நான் BRICS-Africa Outreach மற்றும் BRICS Plus Dialogue ஆகிய நிகழ்வுகளிலும் கலந்து கொள்ள இருக்கிறேன். உலகின் தெற்கு பகுதிகள் மற்றும் இதர பகுதிகளின் வளர்ச்சி தொடர்பானவற்றை விவாதிப்பதற்கு பிரிக்ஸ் ஒரு தளத்தை அமைத்துக் கொடுக்கும்” என தெரிவித்து உள்ளார்.

அதே போன்று, மற்றொமொரு 'X' பதிவில், “ஆகஸ்ட் 25ஆம் தேதி நான் கிரீஸ் நாட்டிற்குச் செல்கிறேன். கிரீஸ், இந்தியா உடன் பல நூற்றாண்டுகளாக நாகரீகத் தொடர்புகளைக் கொண்டு உள்ளது. மேலும், அங்கு கிரீஸ் பிரதமர் கிரியாகோஸ் மிட்சோடாகிஸ் உடன் பேச்சுவார்த்தை நடத்த உள்ளேன். அங்கு உள்ள இந்திய மக்கள் மத்தியிலும் நான் உரையாற்ற உள்ளேன்” என குறிப்பிட்டு இருந்தார்.