வடகொரியா: முன்னாள் அதிபர் கிம் ஜாங் இல்லின் 10ஆம் ஆண்டு நினைவு நாளையொட்டி, நாட்டு மக்கள் 10 நாள்களுக்குச் சிரிக்கக் கூடாது, மது அருந்தக் கூடாது, பிறந்தநாள் போன்ற எந்த விழாக்களும் கொண்டாடக் கூடாது என அந்நாட்டு அதிபர் கிம் ஜாங் உன் உத்தரவிட்டுள்ளதாகத் தகவல் வெளியாகியுள்ளது.
அந்த நாட்டில் சட்டங்கள் மிகவும் கடுமையாக இருக்கும் எனக் கேள்விப்பட்டதுண்டு. அதேபோல் அந்நாட்டில் தகவல்கள் அனைத்தும் வெளி உலகிற்குத் தெரியாமல் பாதுகாத்துக் கொள்வார்கள். ஆனால் அங்குள்ளவர்கள் சிரிக்கவே கூடாது என்று வெளியாகும் தகவல்கள் அந்த நாட்டை பற்றிய கேள்விகளை அதிகரித்துள்ளது.
துக்கம் அனுசரிக்கப்பட வேண்டியதுதான் அதில் மாற்றுக்கருத்தேதும் இல்லை. துக்க வீட்டில்கூட அவர்களின் துயரத்தை கலைக்க சிலர் நகைச்சுவையுடன் கலந்துரையாட கேட்டிருப்போம்.
தொடர்ந்து அழுதுகொண்டிருந்தால் மாரடைப்பு ஏற்படவும் வாய்ப்பு உள்ளது என்று மருத்துவ உலகமே கூறுகிறது. அதனால்தான் துக்க வீடுகளில் தொடர்ந்து அழுபவர்களை ஆசுவாசப்படுத்துவதற்காக இறந்தவரின் பழைய நகைச்சுவை விஷயங்களை நினைவுப்படுத்துவதை அறிந்திருப்போம்.