நாசியில் ஸ்ப்ரே மூலம் செலுத்தப்படும் கரோனா தடுப்புமருந்து - சீனா ஒப்புதல்!

பெய்ஜிங்: நாசியில் ஸ்ப்ரே மூலம் செலுத்தப்படும் கரோனா தடுப்புமருந்தின் முதல்கட்ட மருத்துவ சோதனைக்கு சீனா ஒப்புதல் வழங்கியுள்ளது.

கோவிட்-19 தொற்றின் தாக்கம் உலக நாடுகளில் தொடர்ந்து அதிகரித்துவருகிறது. இந்தத் தொற்றுக்கு தடுப்புமருந்தைக் கண்டுபிடிக்க உலெகங்கும் இருக்கும் பல்வேறு நாடுகளைச் சேர்ந்த ஆராய்ச்சியாளர்களும் ஆய்வுப் பணிகளில் ஈடுபட்டுள்ளனர்.

கரோனாவுக்குப் பல வகையான தடுப்புமருந்துகளை உருவாக்க ஆய்வு பணிகள் நடைபெற்றுவருகிறது. இந்நிலையில், சீனாவில் நாசி வழியாக ஸ்ப்ரே மூலம் செலுத்தப்படும் கோவிட்-19 தடுப்புமருந்தின் மருத்துவ சோதனைக்கு சீனா தற்போது அனுமதியளித்துள்ளது.

இந்தக் கரோனா தடுப்புமருந்தின் முதல்கட்ட மருத்துவ சோதனை வரும் நவம்பர் முதல் வாரம் தொடங்கும் என்று எதிர்பார்க்கப்படுகிறது. இதற்காக 100 தன்னார்வலர்களை தேர்ந்தெடுக்கும் பணிகள் தற்போது நடைபெற்றுவருவதாக தகவல் வெளியாகியுள்ளது.

உலகளவில் நாசி வழியாக செலுத்தப்படும் கரோனா தடுப்புமருந்தின் மருத்துவ சோதனைகளுக்கு அனுமதி அளிக்கப்படுவது இதுவே முதல்முறையாகும். நாசி வழியாக தடுப்புமருந்து செலுத்தப்படுவது இரட்டை பாதுகாப்பை உருவாக்கும் என்று இந்தத் தடுப்புமருந்தை உருவாக்கியுள்ள சீன ஆய்வாளர்கள் நம்பிக்கை தெரிவித்துள்ளனர்.

மேலும், நாசி வழியாக ஸ்ப்ரே மூலம் செலுத்தப்படும் கரோனா தடுப்புமருந்தை எளிதில் அதிகளவில் உற்பத்தி செய்து விநியோகிக்கலாம் என்றும் சீன ஆய்வாளர்கள் தெரிவித்துள்ளனர்.

இந்த வகையிலான தடுப்புமருந்து எவ்வித மோசமான பக்க விளைவுகளை ஏற்படுத்தாது, இருப்பினும் ஆஸ்துமா மற்றும் மூச்சுத் திணறல் போன்ற சுவாச மண்டலத்தில் சில ஆபத்தற்ற பக்க விளைவுகள் ஏற்படக்கூடும் என்று வல்லுநர்கள் கருத்து தெரிவித்துள்ளனர்.

மேலும், ஸ்ப்ரே மூலம் செலுத்தப்படும் இந்தத் தடுப்புமருந்தின் மூலம் உருவாகும் நோய் எதிர்ப்பு சக்திகள் சிறிய காலத்திற்கு மட்டும் நீடிக்குமா அல்லது ஊசி மூலம் செலுத்தப்படும் தடுப்புமருந்தை போல அதிக காலம் நீடிக்குமா என்பது குறித்து உறுதியாகக் கூற முடியாது என்றும் துறைசார்ந்த வல்லுநர்கள் தெரிவித்துள்ளனர்.

இதுதவிர சீனாவில் இதுவரை மூன்று கரோனா தடுப்புமருந்திற்கு ஒப்புதல் வழங்கப்பட்டுள்ளது குறிப்பிடத்தக்கது.

உலகெங்கும் இருந்து இதுவரை கரோனா தொற்று காரணமாக இரண்டு கோடியே 83 லட்சத்து 29 ஆயிரத்து 620 பேர் பாதிக்கப்பட்டுள்ளனர். அவர்களில் ஒன்பது லட்சத்திற்கும் அதிகமானோர் உயிரிழந்துள்ளனர்.

இதையும் படிங்க: கரோனா தடுப்பு மருந்து சோதனை நிறுத்தும்: உலக சுகாதார அமைப்பு கூறுவது என்ன?