உணவுப் பஞ்சம்: ஆப்கனில் மகள்களை விற்கும் பெற்றோர்!

ஆப்கானிஸ்தானில் உணவுக்கு கடும் நெருக்கடி உருவாகியுள்ளதாகத் தகவல் வெளியாகியுள்ளது. ஆப்கானிஸ்தானில் பாதிக்கும் மேற்பட்டோர் மிகக் கடுமையான உணவுத் தட்டுப்பாட்டை சந்தித்து வருவதாக ஐ.நா. எச்சரித்துள்ள சூழலில், இதன் காரணமாக சொந்த மகள்களை விற்கும் அவல நிலைக்கு அந்நாட்டின் பெற்றோர் தள்ளப்பட்டுள்ளனர்.

காபூல் (ஆப்கானிஸ்தான்):உணவுப்பஞ்சம் காரணமாக சொந்த மகள்களை விற்கும் நிலைக்கு ஆப்கன் பெற்றோர் தள்ளப்பட்டிருப்பதாக அதிர்ச்சியளிக்கும் தகவல்கள் வெளியாகியுள்ளன.

வரவிருக்கும் குளிர்காலத்தில் ஆப்கானிஸ்தானில் 2.2 கோடிக்கு மேற்பட்ட மக்கள் உணவுத் தட்டுப்பாட்டை சந்திப்பார்கள் என ஐ.நா. சபை எச்சரித்துள்ளது. ஆகஸ்ட் மாதம் ஆப்கானிஸ்தானில் தாலிபான்கள் ஆட்சியைப் பிடித்தனர்.

உருவாகிய உணவுப்பற்றாக்குறை

தாலிபான்கள் திடீரென ஆட்சியைப் பிடித்ததால் பல்வேறு சீர்கேடுகள் ஏற்பட்டதாகக் கூறப்படுகிறது. இதுமட்டுமல்லாமல், காலநிலை மாற்றத்தால் பயங்கர வறட்சியும் ஏற்பட்டது. இதன்விளைவாக ஆப்கன் மக்கள் உணவுப் பற்றாக்குறையை எதிர்நோக்கியுள்ளனர்.

இதுகுறித்து உலக உணவுத் திட்டத்தின் தலைமை இயக்குநர் டேவிட் பீஸ்லி, "இந்த குளிர்காலத்தில் பல லட்சக்கணக்கான ஆப்கன் மக்கள் உணவுக்காக புலம்பெயர்வார்கள் அல்லது பசியால் வாடுவார்கள். மக்களின் உயிரைக் காப்பாற்ற நாம் உதவி வழங்க வேண்டும்.

ஆப்கானிஸ்தான் தற்போது உலகிலேயே மிக மோசமான நெருக்கடியைச் சந்தித்து வருகிறது. உணவுப் பற்றாக்குறையால் எல்லாம் மோசமாகிவிடும். நேரம் நெருங்கிக்கொண்டே இருக்கிறது. நாம் உடனடியாக செயல்படாவிட்டால் பேரழிவைச் சந்திப்போம்" என்று தெரிவித்துள்ளார்.

மேற்கு ஆப்கானிஸ்தானில் நிகழும் அவலம்

ஏற்கெனவே மேற்கு ஆப்கானிஸ்தானில் ஆயிரக்கணக்கான ஏழைக் குடும்பங்கள் தங்களது கால்நடைகள், உடைமைகளை விற்பது மட்டுமில்லாமல், சிலர் சொந்த மகள்களை விற்கும் அவல நிலைக்குத் தள்ளப்பட்டுள்ளனர்.

ஹெராட், பட்கிஸ் போன்றப் பகுதிகளில் உணவுக்கு வழியில்லாமல் பெற்றோர், தங்களது இளம் மகள்களை திருமணத்துக்காக விற்பனை செய்வதாகவும் அதிர்ச்சிகரத் தகவல்கள் வெளியாகியுள்ளன.

இதையும் படிங்க:சீனாவில் சீறிப்பாயும் புதுவகை கரோனா; புதிய கட்டுப்பாடுகள் அமல்