காத்திருந்து ஆப்கானை கைப்பற்றிய தாலிபன்: யார் புதிய அதிபர்?

ஆப்கானிஸ்தான் தலைநகர் காபூலை தாலிபன்கள் நேற்று (ஆக. 15) கைப்பற்றிய நிலையில் அந்நாட்டின் அதிபராக இருந்த அஷ்ரப் கானி நாட்டை விட்டு வெளியேறினார். இந்தச் பதற்றமான சூழலில் மக்களும் அந்நாட்டை விட்டுச் செல்ல முயற்சித்துவருகின்றனர்.

அமெரிக்க அரசு ஆப்கானிஸ்தானிலிருந்து ராணுவப் படைகளை திரும்பப்பெற்றதை அடுத்து ஆப்கானிஸ்தானின் முக்கிய நகரங்களை 20 ஆண்டுகளுக்கு பிறகு தாலிபன்கள் கைப்பற்றினர்.

தலைநகர் காபூலில் ஆள் அரவமற்றிருந்த காவல் நிலையங்களை தங்கள் கட்டுப்பாட்டுக்குள் கொண்டுவந்த அவர்கள் பல இடங்களில் கொள்ளை அடித்ததாகப் பொதுமக்கள் தெரிவித்துள்ளனர்.

ஆப்கானிஸ்தான் அரசு, தாலிபன்களுக்கிடையேயான பேச்சுவார்த்தைக்குப் பிறகு தாலிபன்கள் இடைக்கால அரசை அமைத்தனர். இதைத்தொடர்ந்து அந்நாட்டு அதிபராக இருந்த கானி வெளியேறினார்.

ஜனவரி 2003ஆம் ஆண்டு முதல் செப்டம்பர் 2005ஆம் ஆண்டு வரை அந்நாட்டின் உள்துறை அமைச்சராக இருந்த அலி அஹ்மத் ஜலாலி புதிதாக உருவாகியுள்ள இடைக்கால அரசின் தலைவராக நியமிக்கப்படவுள்ளதாகக் கூறப்படுகிறது.

காபூல் நகர் தங்களிடம் சமாதானமாக ஒப்படைக்கப்பட வேண்டி காத்திருப்பதாக தாலிபன் செய்தித் தொடர்பாளர் சுஹைல் ஷாஹீன் தெரிவித்தார்.

தாலிபனுக்கும் அரசுக்குமான பேச்சுவார்த்தை குறித்து கூற அவர் மறுத்துவிட்டார். ஆப்கான் அரசு நிபந்தனையற்று சரணடைய வேண்டும் என தாலிபன்கள் விரும்புவதாக அவர் தெரிவித்தார்.

ஆப்கான் அரசுடன் பேச்சுவார்த்தை நடத்திய தாலிபன் அமைப்பின் அரசியல் பிரிவு தலைவர் முல்லா அப்துல் கானி பரதார் ஆப்கானின் வெற்றிக்காக அந்நாட்டு மக்களுக்கு வாழ்த்து தெரிவித்தார். இதையடுத்து காணொலி ஒன்றை வெளியிட்ட அவர் அந்நாட்டில் அமைதி நிலவும் எனவும், நல்ல எதிர்காலம் அமையும் எனவும் உறுதியளித்தார்.

இதையும் படிங்க:ரத்த வெள்ளம் ஓடுவதை தவிர்க்கவே வெளியேறினேன்- ஆப்கான் அதிபர் விளக்கம்