ஆப்கானிஸ்தான்: பாதுகாப்புப் படையினர் நடத்திய அதிரடி தாக்குதலில் 63 தாலிபான்கள் மரணம்!

கபூல்: ஆப்கானிஸ்தானில் தாலிபான் பயங்கரவாதிகளுக்கும், பாதுகாப்புப் படைக்கும் இடையே நடந்த தாக்குதலில், 63 தாலிபான் பயங்கரவாதிகள் சுட்டு வீழ்த்தப்பட்டனர்.

ஆப்கானிஸ்தானின் தாலிபான் பயங்கரவாதிகளுக்கும் அரசுப்படைகளுக்கும் இடையே பல ஆண்டுகளாக நடந்துவரும் உள்நாட்டுப்போரை முடிவுக்கு கொண்டுவர அமெரிக்கா முயற்சி மேற்கொண்டது. அதன் பயனாக தாலிபான்கள் - ஆப்கானிஸ்தான் அரசு இடையே கத்தார் நாட்டில் வைத்து அமைதி பேச்சுவார்த்தை நடைபெற்றுவருகிறது.

ஆனால், தாலிபான் பயங்கரவாதிகள் ஆப்கானிஸ்தானில் தங்கள் தாக்குதல்களைத் தொடர்ந்து நடத்திவருகின்றனர். கடந்த வாரம், இரு தரப்பினரிடையே கடுமையான தாக்குதல் நடைபெற்றது. டிசம்பர் 9ஆம் தேதி வரை கணக்கிட்டதில், கிட்டத்தட்ட 150-க்கும் அதிகமான தாலிபான் பயங்கரவாதிகள், பாதுகாப்புப் படையினரால் சுட்டு வீழ்த்தப்பட்டுள்ளனர்.

இந்நிலையில் நேற்று (டிசம்பர் 13), கந்தகார் உள்பட பல இடங்களில் தாலிபான் பயங்கரவாதிகளுக்கும், ஆப்கான் பாதுகாப்புப் படைக்கும் இடையே நடந்த தாக்குதலில், 63 பயங்கரவாதிகள் வேட்டையாடப்பட்டனர்.

அதில், 7 தற்கொலைப் படை வீரர்களும் அடங்குவர். 29 பேர் காயமடைந்துள்ளனர். இதனை ஆப்கானிஸ்தான் பாதுகாப்பு அமைச்சகம் உறுதிப்படுத்தியுள்ளது. இதுமட்டுமின்றி, ஆப்கான் ராணுவம், 13 வெடிகுண்டுகளைச் செயலிழக்க வைத்தது மட்டுமின்றி பயங்கர ஆயுதங்கள் இருந்த தாலிபான்களின் நான்கு மறைவிடங்களையும் அழித்துள்ளது குறிப்பிடத்தக்கது.