பெண்கள், குழந்தைகளை நினைத்தால் கவலையாக உள்ளது - உலக சுகாதார அமைப்பு

ஜெனிவா : கோவிட்-19 வைரஸால் ஏற்படும் உயிரிழப்புகளை விட, பெண்கள், குழந்தைகள், பதின்ம வயதினருக்கு ஏற்படும் மறைமுக பாதிப்புக்கள் கவலை அளிப்பாக உள்ளது என உலக சுகாதார அமைப்பின் தலைமை இயக்குநர் டெட்ரோஸ் அதானோம் தெரிவித்துள்ளார்.

ஜெனிவாவில் நேற்று நடந்த இணையவழி செய்தியாளர் சந்திப்பின் போது பேசிய டெட்ரோஸ் அதானோம், "கோவிட்-19 தொற்றைச் சமாளிக்க உலக நாடுகளின் சுகாதார அமைப்புகள் திண்டாடி வருகின்றன.

குறிப்பாகக் கர்ப்பிணிப் பெண்கள் பிரசவத்துக்குச் சிகிச்சை பெறமுடியாமல் உயிரிழக்கும் அபாயம் அதிகரித்துள்ளது. கோவிட்-19 உறுதி செய்யப்பட்டு தீவிர அறிகுறி இல்லாத தாய்மார்கள் தங்கள் குழந்தைகளுக்குப் பாலூட்டுவதை யாரும் தடுக்க வேண்டாம்.

கோவிட்-19 வைரஸால் பதின்ம வயதினர், 30 வயதுக்கு உள்பட்டோர் மன அழுத்தம், ஆன்லைன் வன்கொடுமை, பாலியல் வன்கொடுமை, தேவையற்ற கர்ப்பம் போன்ற பிரச்னைகளுக்கு ஆளாகும் அபாயமும் அதிகரித்துள்ளது” என்றார்.

சீனாவில் கடந்த ஆண்டு டிசம்பர் மாதம் பரவத் தொடங்கிய கோவிட்-19 வைரஸ், தற்போது உலகெங்கிலும் கட்டுக்கடங்காமல் பரவி வருகிறது.

இந்நோய்க் காரணமாக உலகளவில் இதுவரை 76 லட்சத்துக்கும் மேற்பட்டோர் பாதிக்கப்பட்டுள்ளனர், 4.5 லட்சத்துக்கும் அதிகமானோர் உயிரிழந்துள்ளனர். உலக பொருளாதாரம் வரலாறு காணாத அளவிற்குச் சரிவைச் சந்தித்து வருகிறது.

இதையும் படிங்க : இந்திய ராணுவ அகாதமியில் பயிற்சி: ராணுவத்தில் இணையும் 333 வீரர்கள்