'ஹஜ் பயணத்தில் பொதுமக்களின் சுகாதாரத்தில் சவுதியே பொறுப்பு'

ஹஜ் பயணத்தில் பொதுமக்களின் சுகாதாரத்தை சவுதி அரசு பார்த்துக்கொள்ள வேண்டும் என உலக சுகாதார அமைப்பு தெரிவித்துள்ளது.

உலகையே அச்சுறுத்திவரும் கரோனா வைரசால் (தீநுண்மி) பாதிக்கப்பட்டவர்களின் எண்ணிக்கை 1 கோடியை நெருங்குகிறது. 51 லட்சத்து 75 ஆயிரத்திற்கும் மேற்பட்டோர் குணமடைந்துள்ளனர் என்றாலும் உயிரிழந்தவர்களின் எண்ணிக்கை 5 லட்சத்தை எட்டும் சூழல் உள்ளது. நாளுக்கு நாள் தீநுண்மி பரவல் அதிகரித்துக்கொண்டே வருவதால் உலகம் முழுவதும் ஒருவித அச்சம் நிலவுகிறது.

இந்நிலையில் இஸ்லாமியர்களின் முக்கியக் கடமைகளில் ஒன்றாகக் கருதப்படும் ஹஜ் புனிதப் பயணம் அடுத்த மாதம் இறுதியில் தொடங்கவுள்ளது. இந்தியாவிலிருந்து ஆயிரக்கணக்கான இஸ்லாமியர்கள், மக்கா, மதினா நகர்களுக்குச் சென்று வழிபடுவது வழக்கம். தற்போது கரோனா தீநுண்மி பரவிவருவதால் ஹஜ் புனித பயணம் செல்ல முடியாத நிலை உருவாகியுள்ளது.

வழக்கமாக உலகம் முழுவதுமிருந்து லட்சக்கணக்கான இஸ்லாமியர்கள் மெக்கா, மதினா நகருக்கு வருகைதருவார்கள். ஆனால், தற்போது கரோனா பரவல் அச்சம் இருப்பதால் ஹஜ் பயணம் தொடர்பாக சவுதி அரசு முக்கிய முடிவை எடுத்துள்ளதாக அங்குள்ள ஊடகங்களில் செய்திகள் வெளியாகி உள்ளன.

இந்தாண்டு ஹஜ் பயணத்தில் பங்கேற்கக்கூடியவர்களின் எண்ணிக்கையை கணிசமாக குறைக்க திட்டமிட்டுள்ளதாக சவுதி அரசு தெரிவித்துள்ளது. மெக்கா நகருக்குப் பல்வேறு நாடுகளிலிருந்து அதிகளவில் மக்கள் புனிதப் பயணம் மேற்கொண்டால், தகுந்த இடைவெளியைக் கடைப்பிடிப்பது சாத்தியமில்லை என்பதால் வெளிநாடுகளிலிருந்து யாரும் புனிதப் பயணம் மேற்கொள்ள வேண்டாம் என உலக சுகாதார அமைப்பு கேட்டுக்கொண்டுள்ளது.

மேலும் சவுதி அரசு முடிவெடுத்துள்ள பங்கேற்கக்கூடியவர்களின் எண்ணிக்கை குறைக்கப்படும் என்ற முடிவு ஆதரிக்கப்பட்டாலும் மக்களின் உடல்நிலையை நாம் கருத்தில்கொள்ள வேண்டும் எனத் தெரிவித்துள்ளது.

ஹஜ்ஜுக்கு வருபவர்களுக்குப் போதுமான மருத்துவ வசதி வேண்டும் என உலக சுகாதார அமைப்பின் தலைவர் டெட்ரோஸ் அதானோம் தெரிவித்துள்ளார்.

இதையும் படிங்க: 'சீர்திருத்த நடவடிக்கைகள் தொடர்கின்றன' - பிரதமர் மோடி