'கமலா ஹாரிஸ் பெயரைத் தனிப்பட்ட லாபத்திற்காகப் பயன்படுத்தக் கூடாது' வெள்ளை மாளிகை எச்சரிக்கை!

வாஷிங்டன்: கமலா ஹாரிஸின் பெயரை வணிக ரீதியான லாபத்திற்காக, அவரது குடும்பத்தினர் உபயோகிப்பதற்கு வெள்ளை மாளிகை கடும் கண்டனம் தெரிவித்துள்ளது.

அமெரிக்காவின் துணை அதிபராக கமலா ஹாரிஸ் பதவி வகித்து வருகிறார். இவரது தாய் தமிழ்நாட்டைப் பூர்வீகமாகக் கொண்டவர். இவரின் வெற்றியைக் கிராம மக்கள் வெகு விமரிசையாகக் கொண்டாடினர். இந்தநிலையில், கமலா ஹாரிஸின் உறவினர் ஒருவர் அவரது பெயரை வர்த்தக ரீதியாகப் பயன்படுத்தியதற்கு வெள்ளை மாளிகை எதிர்ப்பு தெரிவித்துள்ளது.

கமலா ஹாரிஸின் சகோதரி மகளான மீனா ஹாரிஸ், பெண்களுக்கான ஆன்லைன் ஷாப்பிங் நிறுவனம் நடத்தி வருகிறார். இதில் பல வகையான ஆடைகள், புத்தகங்கள் விற்பனை செய்யப்படுகின்றன. இவற்றில் கமலா ஹாரிஸின் பெயரை உபயோகித்து விற்பனையில் லாபம் பார்த்து வந்ததாகத் தெரிகிறது. எடுத்துக்காட்டாக, ‘வைஸ்-பிரெசிடென்ட் ஆண்டி’ என்ற ஆங்கில வாசகங்களுடன் பிரிண்ட் செய்யப்பட்ட ஆடைகள் விற்பனை செய்யப்பட்டுள்ளன.

இதுகுறித்து வெள்ளை மாளிகைக்குத் தகவல் கிடைத்துள்ளது. இதையடுத்து மீனா ஹாரிசுக்கு வெள்ளை மாளிகையின் சார்பில் அறிவுரை வழங்கப்பட்டுள்ளது. அதில், "துணை அதிபர் கமலா ஹாரிஸின் பெயர், புகைப்படங்களைப் பயன்படுத்தி உங்களின் வணிகத்தையோ, சமூக வலைதளம் பக்கங்களையோ பிரபலமாக்கும் முயற்சியில் ஈடுபட வேண்டாம். கமலா ஹாரிஸ் குடும்பத்தினர் மிக உயர்ந்த நெறிமுறைகளை நிலை நிறுத்த வேண்டும்" என குறிப்பிட்டிருந்தனர்.

மீனா ஹாரிஸ் வெளிநாட்டு விவகாரங்கள் தொடர்பாகவும் அடிக்கடி கருத்து தெரிவித்து வருகிறார். சமீபத்தில் டெல்லியில் போராட்டம் நடத்தும் விவசாயிகளுக்கு ஆதரவாகக் கருத்து தெரிவித்தது குறிப்பிடத்தக்கது.

இதையும் படிங்க:ஒரு வருடத்திற்கு பிறகு பொதுவெளியில் தோன்றிய வடகொரிய அதிபரின் மனைவி