கரோனா தடுப்பு மருந்தின் அவசரகாலப் பயன்பாட்டிற்கு பிரிட்டன் ஒப்புதல் அளித்துள்ளது. இந்நிலையில், அமெரிக்காவிலும் தடுப்பு மருந்திற்கு ஒப்புதல் வழங்கும் பணிகள் இறுதிக்கட்டத்தில் உள்ளதாக கரோனா தடுப்பு மருந்து விநியோகத்தைக் கண்காணிக்க அமைக்கப்பட்டுள்ள ஆபரேஷன் வார்ப் ஸ்பீட் அமைப்பு அறிவித்துள்ளது.
இது குறித்து அந்த அமைப்பின் தலைமை ஆலோசகர் மான்செஃப் ஸ்லாவி கூறுகையில், "பிப்ரவரி இறுதிக்குள் சுமார் 10 கோடி பேருக்கு கரோனா தடுப்பு மருந்தை வழங்க முடியும் என்று நம்புகிறோம். இதில் ஆபத்தான கட்டத்திலுள்ள உள்ள அனைவருக்கும் தடுப்பு மருந்தை வழங்க முடியும். வரும் டிசம்பர் 10 அல்லது 11ஆம் தேதி, ஏதேனும் ஒரு தடுப்பு மருந்தின் அவசரகால பயன்பாட்டிற்கு ஒப்புதல் அளிக்கப்படும்.
ஜான்சன் & ஜான்சன் நிறுவனத்தின் கரோனா தடுப்பு மருந்திற்கு விரைவில் ஒப்புதல் வழங்கப்படும் என்று நம்புகிறேன். அவ்வாறு ஒப்புதல் அளிக்கப்படும்பட்சத்தில் அது முக்கிய சாதனையாக இருக்கும். ஏனென்றால், ஜான்சன் & ஜான்சனின் கரோனா தடுப்பு மருந்து ஒரு டோஸை எடுத்துக்கொண்டால் போதும். இதனால் குறிப்பிட்ட அளவு மக்களுக்கு ஒரே நேரத்தில் தடுப்பு மருந்தை அளிக்க முடியும்.