கரோனாவுக்கு பிளாஸ்மா சிகிச்சை மூலம் பலன் - அமெரிக்க மருத்துவமனை தகவல்

நியூயார்க்: கரோனாவால் பாதிக்கப்பட்ட நபர்களுக்கு பிளாஸ்மா மருத்துவ சிகிச்சை மூலம் பலன் கிடைத்துள்ளதாக, மவுண்ட் சினாய் மருத்துவமனை நடத்திய ஆய்வில் தெரியவந்துள்ளது.

உலக பெருந்தொற்றான கரோனா பாதிப்பிற்கு தற்போது வரை சிகிச்சை முறையோ, மருந்தோ கண்டுபிடிக்கப்படாத சூழலில், பல்வேறு விதமாக சிகிச்சை முறை மேற்கொள்ளப்படுகிறது. இதில் முக்கிய சிகிச்சை முறையாக பிளாஸ்மா சிகிச்சை முறை கருதப்படுகிறது.

கரோனா பாதிப்பிலிருந்து மீண்டுவந்த நபர்களின் உடலில் உள்ள ரத்தத்தை பயன்படுத்தி இந்த சிகிச்சை மேற்கொள்ளப்படுகிறது. இந்த சிகிச்சையை சர்வதேச அளவில் பல்வேறு மருத்துவ நிபுணர்களின் வழிகாட்டுதலின்படி, முன்னணி மருத்துவர்கள் மேற்கொண்டுவருகின்றனர்.

அமெரிக்கா நியூயார்க் நகரில் உள்ள மவுண்ட் சினாய் மருத்துவமனை இந்த பிளாஸ்மா சிகிச்சை குறித்து ஆய்வறிக்கை ஒன்றை வெளியிட்டுள்ளது. பிளாஸ்மா சிகிச்சை மேற்கொண்ட நபர்கள், சிகிச்சைக்கு உட்படாத நபர்கள் குறித்து விரிவான தகவல்களை இந்த ஆய்வு அளிக்கின்றது.

அதன்படி, பிளாஸ்மா சிகிச்சை பெறாத நபர்களின் எண்ணிக்கையை ஒப்பிடும்போது சிகிச்சை பெற்ற நபர்களின் இறப்பு விகிதம் பாதியாகக் குறைந்துள்ளது. மேலும், பிளாஸ்மா சிகிச்சை பெற்ற நபர்கள் சிகிச்சை மேற்கொள்ளாத நபர்களை ஒப்பிடுகையில் விரைவில் குணமடைந்துள்ளனர்.

எனவே, கரோனா அதிகம் பாதித்த நியூயார்க் நகரில் இந்த சிகிச்சை முறை நல்ல பலன் தந்துள்ளது பெரும் நம்பிக்கை அளிப்பதாக மவுண்ட் சினாய் மருத்துவமனை நிர்வாகம் தெரிவித்துள்ளது. இந்த சிகிச்சை முறையை இன்னும் தீவிரப்படுத்த அந்நாட்டு மருத்துவ நிபுணர் குழு பரிந்துரை செய்துள்ளது.

இதையும் படிங்க:சீனாவிலிருந்து சென்னை வந்த பூனை: 3 மாதம் தனிமைப்படுத்தல் முடிந்து விடுவிப்பு!