ட்ரம்ப்புக்கு எதிராக எவிடென்ஸ்: பிரபல சட்ட நிறுவனத்திடம் 42 மில்லியன் பணம் கேட்டு மிரட்டல்!

வாஷிங்டன் : அமெரிக்க அதிபர் ட்ரம்ப்புக்கு எதிராகத் தங்களிடம் ஆதாரம் உள்ளதாகவும், அதனை வெளியிடாமல் இருக்க வேண்டுமெனில் 42 மில்லியன் டாலர்களைக் கொடுக்குமாறும் பிரபல சட்ட நிறுவனத்துக்கு ஹேக்கர்கள் மிரட்டல் விடுத்துள்ளனர்.

நியூயார்க் நகரைத் தலைமையகமாக கொண்டு செயல்படும் தனியார் சட்ட நிறுவனம் 'குரூப்மென் ஷிரே மெய்செலஸ் அண்ட் சேக்ஸ்'. பிரபல ஹாலிவுட் நடிகர்கள், பாடகர்கள், இயக்குநர்கள் இந்த நிறுவனத்தின் வாடிக்கையாளர்களாக உள்ளனர்.

இந்நிலையில், குரூப்மென் ஷிரே நிறுவனத்தின் இணையத்தை ஊடுருவி 756 ஜிகா பைட் அளவிலான தரவுகளை தாங்கள் திருடிவிட்டதாகவும், அதில் அமெரிக்க அதிபர் ட்ரம்ப்புக்கு எதிரான ஆதாரமும் சிக்கியுள்ளதாகவும், அதனை வெளியிடாமல் இருக்க வேண்டுமெனில் 42 மில்லியன் டாலர் ( சுமார் 318 கோடி ரூபாய்) பணத்தைக் கொடுக்க வேண்டும் என ரீவில் (REvil) என்ற ஹேக்கர் கும்பல் மிரட்டல் விடுத்துள்ளது.

இதுகுறித்து அந்த ஹேக்கர் கும்பல் இணையத்தில் வெளியிட்டுள்ள பதிவில், "அடுத்ததாக டொனால்டு ட்ரம்ப்புக்கு எதிரான ஆதாரங்களை வெளியிடுவோம். தேர்தல் சூடுபிடித்து வரும் இந்த வேளையில், இது எங்கள் கையில் சிக்கியுள்ளது. வாக்காளர் பெருமக்களே, நீங்கள் அவரை மீண்டும் அதிபராகப் பார்க்க விரும்பவில்லை என்பது எங்களுக்குத் தெரியும்.

பணம் தரவில்லை என்றால், குரூப்மேன் நிறுவனத்தை அழித்து தரைமட்டமாக்கி விடுவோம்" என எச்சரித்துள்ளனர். ஆனால், அதனை உறுதி செய்ய அவர்கள் எந்த ஆதராத்தையும் வெளியிடவில்லை.

குரூப்மேன் நிறுவனம் வெளியிட்டுள்ள அறிக்கையில், "வெளிநாட்டு சைபர் கிரிமினல்கள் நம் அரசாங்கத்தின், தேர்தலின், தனிநபரின் தரவுகளைக் கொள்ளையடிக்கும் சம்பவங்கள் சமீப காலமாக அதிகரித்த வண்ணம் உள்ளது. அந்த வகையில், சட்ட நிறுவனங்களும் இவர்களுக்கு இரையாகி விடுகின்றன.

சைபர் பாதுகாப்பை அதிகரிக்க நாங்கள் அதிகப் பணம் செலவழித்த போதிலும், எங்கள் நெட்வொர்க்கை ஊடுருவி ஹேக்கர்கள் தரவுகளைத் திருடி, பணம் கேட்டு மிரட்டுவது வேதனையளிப்பதாக உள்ளது. அரசுடன் சேர்ந்து இப்பிரச்னையைத் தீர்க்க முயன்று வருகிறோம்" எனத் தெரிவித்துள்ளது.

இந்த விவகாரம் வெள்ளை மாளிகை வட்டாரங்களில் பெரும் பரபரப்பை ஏற்படுத்தியுள்ளது.

இதையும் படிங்க : வீட்டில் முடங்கிக் கிடப்பவர்கள் உஷார்!