கரோனாவுக்கு எதிரான தடுப்பூசி ஆராய்ச்சியில் இணைந்து பணியாற்றும் இந்தியா-அமெரிக்கா

வாஷிங்டன்: கரோனாவைக் கட்டுப்படுத்தும் மூன்று தடுப்பூசிகளைக் கண்டுபிடிப்பதற்கான ஆராய்ச்சியில் இந்தியா-அமெரிக்கா நாடுகளைச் சேர்ந்த மருந்து நிறுவனங்கள் இணைந்து செயல்பட்டு வருவதாக அமெரிக்காவுக்கான இந்திய தூதர் தரன்ஜித் சிங் சந்து தெரிவித்துள்ளார்.

உலகம் முழுவதும் கரோனா வைரஸ் பாதிப்புகள் நாளுக்கு நாள் அதிகரித்துக் கொண்டே செல்கின்றன. இதுவரை அதிகபட்சமாக அமெரிக்காவில் 13 லட்சத்திற்கும் அதிகமானோர் கரோனாவால் பாதிக்கப்பட்டுள்ளனர். இதனால் கரோனாவுக்கான மருந்தைக் கண்டுபிடிக்க உலகம் முழுவதும் பல்வேறு மருந்து நிறுவனங்களால் ஆராய்ச்சிகள் மேற்கொள்ளப்பட்டு வருகின்றன.

இந்நிலையில் அமெரிக்காவுக்கான இந்திய தூதர் தரன்ஜித் சிங் சந்து பேசுகையில், ''கரோனா வைரசைக் கட்டுப்படுத்தும் தடுப்பூசிகளைக் கண்டுபிடிக்க இந்தியா-அமெரிக்கா நாடுகளின் மருந்து நிறுவனங்கள் கைகோத்துள்ளன.

ஐ.சி.எம்.ஈ.ஆர். (ICMER) மற்றும் சி.டி.சி. (CDC) ஆகியவை இணைந்து கரோனாவுக்கான தடுப்பூசி ஆராய்ச்சியில் ஈடுபட்டுள்ளன. இந்த ஆராய்ச்சியின் மூலம் குறைந்தது மூன்று தடுப்பூசிகள் கண்டுபிடிக்கப்படும். இரு நாடுகளும் மருத்துவ ஆராய்ச்சியில் பல வருடங்களாக இணைந்து செயல்பட்டு வருகின்றன.

ஏற்கனவே ராடோ வைரஸ் என்னும் தொற்றுக்கு தடுப்பூசி கண்டுபிடித்துள்ளனர். இது பல்வேறு நாடுகளுக்கும் உதவியாக இருந்தது. மருத்துவ ஆராய்ச்சியில் எந்த முன்னேற்றம் அடைந்தாலும், இரு நாடுகளும் தங்களது தகவல்களைப் பரிமாறிக்கொள்வதால் மருந்து வேகமாகல் கண்டுபிடிக்கப்படும்'' எனத் தெரிவித்தார்.

அமெரிக்கா, இந்தியா ஆகிய இரு நாடுகளும் கரோனா வைரசை எதிர்கொள்ள தொடக்கம் முதலே இணைந்து பணியாற்றி வருகின்றனர். கரோனா வைரசைக் கட்டுப்படுத்துவதற்காக 5.9 மில்லியன் அமெரிக்க டாலர்களை இந்தியாவுக்கு அமெரிக்கா வழங்கியது. அதேபோல் அமெரிக்க அதிபர் டொனால்ட் ட்ரம்ப் எச்சரிக்கை விடுத்தபின், இந்தியாவிலிருந்து ஹைட்ராக்சிகுளோரோகுயின் அமெரிக்காவுக்கு ஏற்றுமதி செய்யப்பட்டது குறிப்பிடத்தக்கது.

இதையும் படிங்க:முழு பேரழிவுக்கு வித்திட்ட ட்ரம்ப் - முன்னாள் அமெரிக்க அதிபர் ஒபாமா தாக்கு!