எரியும் காரிலிருந்து காவலரைக் காப்பாற்றிய ஆப்பிரிக்க அமெரிக்கர்!

வாஷிங்டன்: அமெரிக்காவில் நிறவெறிக்கு எதிரான போராட்டங்கள் வலுபெற்றுள்ள நிலையில், பென்சில்வேனியா பகுதியில் எரியும் காரிலிருந்து வெள்ளையினக் காவலரை ஆப்பிரிக்க அமெரிக்கர் ஒருவர் காப்பாற்றிய சம்பவம் நெகிழ்ச்சி ஏற்படுத்தியுள்ளது.

அமெரிக்காவின் மினியாபோலிஸ் நகரில், ஜார்ஜ் ஃப்ளாய்ட் என்ற ஆப்பிரிக்க அமெரிக்கரை காவலர் ஒருவர் சுமார் எட்டு நிமிடம் 56 நொடிகள் choke hold எனப்படும் கோரப் பிடியில் வைத்திருந்தார். தன்னால் மூச்சுவிட முடியவில்லை என்று பலமுறை கதறியும், காவலர் தனது பிடியைth தளர்த்தாததால் ஜார்ஜ் ஃப்ளாய்ட் உயிரிழந்தார். அதைத் தொடர்ந்து அமெரிக்காவில் நிறவெறிக்கு எதிரான போராட்டங்கள் வலுவடைந்துவருகின்றன.

இந்நிலையில், பென்சில்வேனியா மாகாணத்தில் எரியும் காரிலிருந்து வெள்ளையினக் காவலர் ஒருவரை ஆப்பிரிக்க அமெரிக்கர் காப்பாற்றிய சம்பவம் நெகிழ்ச்சியை ஏற்படுத்தியுள்ளது. 46 வயதான டேலன் மெக்லீ, பென்சில்வேனியாவிலுள்ள யுனிடவுன் பகுதியிலுள்ள தனது வீட்டிலிருந்தபோது அவரது உறவினர் வந்து, காவல் துறையினர் கார் ஒன்று விபத்தில் சிக்கியிருப்பதாகக் கூறியிருக்கிறார்.

அதைக் கேட்டதும் நொடியும் தாமதிக்காத டேலன் மெக்லீ, உடனடியாக கார் கதவை உடைத்து, உள்ளே இருந்த காவலரைக் காப்பாற்றியுள்ளார். டேலன் மெக்லீ காவலரைக் காப்பற்றிய சிறிது நேரத்திலேயே கார் முழுவதுமாகத் தீ பரவியது. டேலன் மெக்லீயின் சரியான நடவடிக்கையால் சிறிய காயங்களுடன் அந்தக் காவலர் உயிர் தப்பியுள்ளார்.

இருப்பினும், டேலன் மெக்லீக்கும் அமெரிக்க காவல் துறையினருக்குமான தொடர்பு அவ்வளவு சிறப்பான ஒன்றாக இருந்ததில்லை. இரண்டு முறை டேலன் மெக்லீ மீது காவலர்கள் பொய் வழக்கு பதிவு செய்துள்ளனர். இதனால், டேலன் மெக்லீ எந்தத் தவறும் செய்யாமலேயே சுமார் ஒரு ஆண்டு வரை சிறையிலிருக்க வேண்டிய சூழ்நிலையும் ஏற்பட்டிருந்தது.

இதனால் அந்தக் காவலரைக் காப்பாற்றும் முன் ஏதாவது தயக்கம் ஏற்பட்டதா? என்று செய்தியாளர் கேட்டதற்கு டேலன் மெக்லீ கூறுகையில், "இல்லை. ஒரு துளியும்கூட எனக்குத் தயக்கம் ஏற்படவில்லை. அனைத்து உயிர்களுக்கும் மதிப்பு உள்ளது. நாம் அனைவரும் கடவுளின் குழந்தைகள். என் கண் முன் ஒருவர் தீயில் எரிவதைப் பார்த்துகொண்டிருக்க முடியாது" என்றார்.

இதையும் படிங்க: ஜார்ஜ் ஃப்ளாய்ட் மரணம் - கலைக்கப்பட்ட மினியாபோலிஸ் காவல் துறை