சென்னை: தமிழ் சினிமாவில் முன்னணி கலை இயக்குநராக பணியாற்றி வந்த மிலன் மாரடைப்பு காரணமாக இன்று (அக்.15) காலமானார். மிலன் பெர்னாண்டஸ் என்ற இயற்பெயர் கொண்ட இவர், சென்னையில் பிறந்தவர். 1999ஆம் ஆண்டு திரைப்படத் துறையில் பணியாற்றத் தொடங்கி உள்ளார்.
ஆரம்பத்தில் பிரபல கலை இயக்குனர் சாபு சிரிலுடன் இணைந்து பணியாற்றினார். பின்னர் சிட்டிசன் (2001), தமிழன் (2002), ரெட் (2002), வில்லன் (2002) மற்றும் அந்நியன் (2005) ஆகிய படங்களில் மிலன் உதவி கலை இயக்குநராகப் பணியாற்றினார். இதனையடுத்து, கலை இயக்குநராக அவர் பணியாற்றிய முதல் படம் கலாபக் காதலன். இப்படம் 2006ஆம் ஆண்டு வெளியானது.
மிலன் பெர்னாண்டஸ் அடுத்ததாக ‘ஓரம் போ’ என்ற படத்தில் வேலை செய்தார். ஓரம் போ திரைப்படம் 2007ஆம் ஆண்டு வெளியிடப்பட்டது. இதுவரை 30க்கும் மேற்பட்ட திரைப்படங்களில் பணிபுரிந்துள்ளார். அஜித் நடித்த நிறைய படங்களுக்கு இவர் கலை இயக்குநராக பணிபுரிந்துள்ளார். அஜித்துக்கு மிகவும் பிடித்த கலை இயக்குநர் இவர் என்பது குறிப்பிடத்தக்கது.