விடுதலை பார்ட் 2 குமரேசன் ரெடி:வெற்றிமாறன் இயக்கத்தில் விஜய் சேதுபதி, சூரி உள்ளிட்டோர் நடித்து கடந்த மார்ச் மாதம் வெளியான திரைப்படம் விடுதலை. ஜெயமோகனின் துணைவன் சிறுகதையை அடிப்படையாக கொண்டு எடுக்கப்பட்டிருந்தது. இப்படத்தில் சூரி முதல் முறையாக கதை நாயகனாக நடித்து இருந்தார். இதில் குமரேசனாகவே வாழ்ந்திருந்தார். இதன் இரண்டாம் பாகம் எப்போது என ரசிகர்கள் காத்துக்கொண்டு இருக்கின்றனர்.
இந்த நிலையில் இரண்டாம் பாகத்திற்கு தயாராகும் வீடியோ ஒன்றை தனது சமூக வலைத்தள பக்கத்தில் பகிர்ந்துள்ளார் நடிகர் சூரி. அதில் சூரி குமரேசன் கதாபாத்திரத்திற்காக சிகை அலங்காரம் செய்து போலீஸ் உடை அணிந்து கையில் துப்பாக்கியுடன் நடந்து வருகிறார். இதனால் விடுதலை 2 படப்பிடிப்பு தொடங்கியுள்ளதாக தெரிகிறது. பார்ட் 2 விற்கு ஒருசில காட்சிகள் மட்டுமே எடுக்கப்பட உள்ளதாக தகவல் வெளியாகியுள்ளது.
மாலத்தீவில் ரிலாக்ஸாக ஓய்வு எடுக்கும் ரஜினி:நடிகர் ரஜினிகாந்த் அண்ணாத்தே படத்துக்கு பிறகு தற்போது நெல்சன் இயக்கத்தில் ஜெயிலர் படத்தில் நடித்து வருகிறார். இப்படத்தில் தமன்னா, மோகன் லால் உள்ளிட்ட ஏராளமான நட்சத்திரங்கள் நடித்துள்ளனர். இப்படம் வருகிற ஆகஸ்ட் 10 ம் தேதி திரையரங்குகளில் வெளியாகிறது. இப்படத்தில் இருந்து காவாலா, ஹுக்கும் ஆகிய பாடல்கள் வெளியாகி ரசிகர்கள் மத்தியில் மிகுந்த வரவேற்பைப் பெற்று வருகிறது.
ஹுக்கும் பாடலின் வரிகள் ரசிகர்கள் மத்தியில் பெரும் வரவேற்பை பெற்று வருகிறது. மேலும் ரஜினிகாந்த் அவரது மகள் சௌந்தர்யா இயக்கும் லால் சலாம் படத்தில் சிறப்பு தோற்றத்தில் நடிக்கிறார். அதன் படப்பிடிப்பு தற்போது நிறைவடைந்தது. இந்த நிலையில் ரஜினிகாந்த் தற்போது மாலத்தீவில் ஓய்வு எடுத்து வருகிறார். மாலத்தீவு கடற்கரையில் ஹாயாக நடந்து வரும் புகைப்படங்கள் வெளியாகி சமூக வலைத்தளங்களில் வைரலாகி வருகிறது.
செவாலியே விருது பெற்ற அருணா சாய்ராம்:அருணா சாய்ராம் கர்நாடக இசை உலகின் ராக் ஸ்டார் என்று ரசிகர்களால் அன்புடன் அழைக்கப்படுவது அனைவரும் அறிந்ததே. பத்மஸ்ரீ, சங்கீத கலாநிதி உள்ளிட்ட உயரிய விருதுகளை இதுவரை வென்றுள்ள அருணா சாய்ராம், தற்போது தனக்கும், கர்நாடக இசைக்கும் மட்டுமில்லாமல் இந்திய நாட்டுக்கே பெரும் கௌரவத்தை ஈட்டித் தந்துள்ளார்.
ஆம், பிரான்ஸ் நாட்டின் மிகப் பெரிய விருதான உலக அளவில் பெரிதும் மதிக்கப்படும் செவாலியர் விருது அவருக்கு வழங்கப்பட்டது. இந்த விருதை நடிகர் திலகம் சிவாஜி கணேசன் இதற்கு முன்னர் பெற்றது நம் அனைவருக்கும் தெரியும். மும்பையில் சிறு வயது முதல் நடிகர் திலகம் சிவாஜி கணேசன் நடித்த படங்களை அங்குள்ள திரையரங்குகளில் பேரார்வத்துடன் பார்த்து ரசித்ததை அவர் நினைவுக் கூர்ந்த அருணா சாய்ராம், நடிகர் திலகத்தின் மிகப் பெரும் ரசிகையான நான், அவர் பெற்ற விருதை பெறுவது எனக்கு கிடைத்த மிகப்பெரிய கௌரவம் என்றார்.
முதல் முறையாக நாய்கள் மட்டுமே நடிக்கும் கிளெவர்:தமிழ் சினிமாவில் எத்தனையோ புதுமுயற்சிகள் வந்துள்ளன. ஒருவர் மட்டுமே நடிக்கும் படம், பாடல்கள் இல்லாத படம், வசனம் இல்லாத படம் என வித்தியாசமான கதையம்சம் கொண்ட படங்களை பார்த்துள்ளோம். இந்த நிலையில் தற்போது நாய்கள் மட்டுமே நடிக்கும் படம் ஒன்று எடுக்கப்பட்டுள்ளது. இப்படத்தை செந்தில்குமார் என்பவர் இயக்கியுள்ளார். இதன் ஃபர்ஸ்ட் லுக் போஸ்டரை பாடலாசிரியர் சினேகன் வெளியிட்டுள்ளார்.
நாய்கள் மட்டுமே நடிக்கும் கிளெவர்
இதுகுறித்து அவர் தனது ட்விட்டர் பக்கத்தில், முதல் முறையாக மனித கதாப்பாத்திரங்களே இல்லாமல் நம்மோடு நட்பாகவும், உறவாகவும் வாழும் ஒரு உயிரின் உணர்வுகளை சொல்லும் இந்த "CLEVER" திரைப்படத்தின் முதல் பார்வையை வெளியிடுவதில் மகிழ்வு கொள்கிறேன். இந்த புதிய முயற்சிக்கு வித்திட்ட இயக்குனர் செந்தில்குமார் சுப்ரமணியம் மற்றும் படக்குழுவினரை வாழ்த்துவோம் என்று பதிவிட்டுள்ளார்.
மறைந்த நடிகை சௌந்தர்யா பிறந்த தினம் இன்று:தமிழ் சினிமாவில் அருணாச்சலம், படையப்பா, காதலா காதலா, பொன்னுமணி, தவசி போன்ற தமிழ் படங்களில் நடித்தவர் நடிகை செளந்தர்யா. அழகான நடிகை என்று ரசிகர்களால் அழைக்கப்பட்டவர். திறமையான நடிகையும் கூட. தமிழ் தவிர்த்து தெலுங்கு, கன்னடம், மலையாளம் உள்ளிட்ட மொழிகளிலும் 100க்கும் மேற்பட்ட படங்களில் நடித்துள்ளார்.
இவர் கடந்த 2004 ஆம் ஆண்டு பாரதிய ஜனதா கட்சிக்கு ஆதரவாக பொதுக்கூட்டங்களில் கலந்து கொள்ள ஹெலிகாப்டரில் சென்ற போது ஏற்பட்ட விபத்தில் மரணமடைந்தார். அப்போது அவர் கர்ப்பமாக இருந்தார் என்பதும் குறிப்பிடத்தக்கது. இந்த நிலையில் இன்று இவரது பிறந்த தினம், அவரது ரசிகர்களால் உற்சாகமாக கொண்டாடப்பட்டு வருகிறது.
இதையும் படிங்க: Jailer Second Single: வெளியானது சூப்பர் ஸ்டாரின் ஹுக்கும்!
