லோகேஷ் கனகராஜ் இயக்கத்தில் விஜய் புதிய படத்தில் நடித்து வருகிறார். இன்னும் பெயரிடப்படாத இப்படத்திற்கு தற்காலிகமாக 'தளபதி 67' என்று அழைக்கப்பட்டு வருகிறது. இப்படத்தை 7 ஸ்கிரீன் ஸ்டுடியோ லலித் குமார் தயாரிக்கிறார். இசையமைப்பாளர் அனிருத் இசையமைக்கிறார். கடந்த சில மாதங்களாகவே இந்த படத்திற்கான அப்டேட் கேட்டு ரசிகர்கள் தொடர்ந்து சமூக வலைதளங்களில் குரல் எழுப்பி வந்தனர்.
இந்நிலையில் ஜனவரி 30 ஆம் தேதி முதல், தற்போது வரை தினமும் புதிய அப்டேட்டுகளை படக்குழுவினர் அறிவித்து வருகின்றனர். அதன் படி படத்தின் தயாரிப்பு நிறுவனமான 7 ஸ்கிரீன் ஸ்டுடியோ கடந்த இரண்டு நாட்களாக படத்தில் நடிக்கும் நடிகர்கள் குறித்த விவரங்களை வெளியிட்டு வருகின்றனர்.
அதன் படி முன்பு கூறப்பட்டு வந்தது போலவே நடிகை திரிஷா இந்த படத்தில் இருப்பதனை படக்குழு உறுதி செய்துள்ளது. முன்னதாக இருவரும் கில்லி, ஆதி, குருவி, திருப்பாச்சி ஆகிய படங்களில் நடித்துள்ளனர். இறுதியாக கடந்த 2008 ஆம் ஆண்டு வெளியான குருவி படத்திற்கு பிறகு, மீண்டும் 14 ஆண்டுகள் கழித்து இருவரும் இணைகின்றனர். இது ரசிகர்களை உற்சாகத்தில் ஆழ்த்தியுள்ளது.
முன்னதாக இந்த படத்தில் நடிக்கும் நடிகர்களை படக்குழு அறிவித்திருந்தது. அதன் படி இப்படத்தில் பாலிவுட் நடிகர் சஞ்சய் தத், இயக்குநர்கள் கௌதம் மேனன் மற்றும் மிஷ்கின், மன்சூர் அலிகான், பிரியா ஆனந்த், மலையாள நடிகர் மாத்திவ் தாமஸ், நடன இயக்குநரான சாண்டி மற்றும் அர்ஜூன் என ஆகியோர் நடித்து வருவதாக அறிவிக்கப்பட்டுள்ளது.
இதனை தொடர்ந்து படக்குழுவினர் நேற்று படத்தின் பூஜை வீடியோவையும் வெளியிட்டுள்ளனர். இந்த படத்தில் நடிக்கும் விஜய், திரிஷா, அர்ஜூன், மன்சூர் அலி கான் என பலர் கலந்துகொண்டுள்ளனர். மேலும் இந்த பூஜையில் கைதி படத்தில் நெப்போலியன் கதாப்பத்திரத்தில் நடித்த ஜார்ஜ் மரியனும் இடம் பெற்றிருந்ததால், இந்த படம் இயக்குநர் லோகேஷ் கனகராஜின் LCUவில் இணைவதற்கான வாய்ப்புள்ளது என சமூக வலைதளங்களில் ரசிகர்கள் பதிவிட்டு வருகின்றனர்.
இப்படியான தொடர் அப்டேட்டுகளில் அடுத்த படியாக விக்ரம் படத்திற்கு வெளியிடப்பட்ட பிரோமோ வீடீயோ போல, இந்த தளபதி 67 படத்திற்கும் எடுக்கப்பட்டுள்ள வீடியோ வெளியீட்டு தேதி அறிவிக்கப்படும் என எதிர்பார்க்கப்படுகிறது. படத்தின் இந்த படத்தின் படப்பிடிப்பு தொடங்கி தற்போது காஷ்மீரில் நடந்து வருகிறது. இதற்காக தனி விமான மூலம் காஷ்மீர் செல்ல படக்குழுவினர் விமான நிலையத்தில் காத்திருந்த வீடியோவும் சமூக வலைதளங்களில் வைரலானது குறிப்பிடத்தக்கது.
இதையும் படிங்க:என்னுடைய கதையை ரசித்துக்கேட்டார் நடிகர் விஜய் - ஆர்.ஜே.பாலாஜி!
