சென்னை:இயக்குனர் நெல்சன் இயக்கத்தில் ரஜினிகாந்த் நடித்து சமீபத்தில் வெளியான திரைப்படம் ஜெயிலர். இப்படத்தை சன் பிக்சர்ஸ் தயாரிக்க அனிருத் இசை அமைத்திருந்தார். மேலும் இப்படத்தில் தமன்னா, மோகன் லால், சிவராஜ் குமார், ஜாக்கி ஷெராப், ரம்யா கிருஷ்ணன் உள்ளிட்டோர் நடித்திருந்தனர். படம் வெளியாகி மிகப் பெரிய வெற்றியைப் பெற்றது. இதுவரை உலகம் முழுவதும் ரூ.600 கோடிக்கு மேல் வசூல் செய்துள்ளது.
ஜெயிலர் வெற்றி ரஜினிக்கு மிகப் பெரிய உற்சாகத்தை கொடுத்துள்ளது. இதனை தொடர்ந்து தனது மகள் ஐஸ்வர்யா இயக்கி வரும் லால் சலாம் என்ற படத்தில் மொய்தீன் பாய் என்ற சிறப்பு தோற்றத்தில் ரஜினி நடித்துள்ளார். அதனை தொடர்ந்து இயக்குனர் ஞானவேல் இயக்கத்தில் தனது 170வது படத்தில் நடிக்கிறார். இதற்கான அறிவிப்பு வந்ததில் இருந்து எதிர்பார்ப்பு அதிகரித்துள்ளது.
இயக்குனர் ஞானவேல் ரத்த சரித்திரம், பயணம், தோனி உள்ளிட்ட படங்களில் பணிபுரிந்தவர். பின்னர் கடந்த 2017ம் ஆண்டு கூட்டத்தில் ஒருவன் படத்தின் மூலம் இயக்குனராக அறிமுகமானவர். அதனை தொடர்ந்து அவர் இயக்கி ஜெய்பீம் திரைப்படம் உலக அளவில் இவருக்குப் புகழை பெற்றுத் தந்தது. ஆஸ்கர் மேடை வரை சென்றது.