சென்னை: சூப்பர் ஸ்டார் நடிகர் ரஜினிகாந்தின் 169-ஆவது படம் ஜெயிலர். இப்படத்தை இயக்குநர் நெல்சன் இயக்குகிறார். மலையாள நடிகர் மோகன் லால், கன்னட நடிகர் சிவராஜ்குமார், ஹிந்தி நடிகர் ஜாக்கி ஷ்ரோஃப், யோகி பாபு, தமன்னா, ரம்யா கிருஷ்ணன், பிரியக்கா மோகன் ஆகிய முன்னணி நட்சத்திரங்கள் பலர் இப்படத்தில் நடித்துள்ளனர். சன் பிக்சர்ஸ் தயாரிக்கும் இப்படத்திற்கு அனிருத் இசையமைத்துள்ளார்.
அண்மையில் இப்படத்தில் இடம்பெற்றுள்ள 'காவாலா' மேக்கிங் வீடியோ வெளியாகி பெரும் வரவேற்பை பெற்றுள்ள நிலையில், படத்தின் அடுத்த அப்டேட் நாளை மாலை 6 மணிக்கு வெளியாக உள்ளதாக சன் பிக்சர்ஸ் நிறுவனம் அதன் ட்விட்டர் பக்கத்தில் தெரிவித்துள்ளது. இதனால் சூப்பர் ஸ்டார் ரசிகர்கள் மகிழ்ச்சியில் ஆழ்ந்துள்ளனர்.
மேலும் அந்த ட்விட்டர் பதிவில், "சூப்பர் ஸ்டார் சம்பவம் லோடிங்" என்று குறிப்பிட்டு இருந்தது ரசிகர்கள் மத்தியில் பெரும் வரவேற்பையும், இந்த இரண்டாவது பாடல் குறித்து மிகுந்த எதிர்பார்ப்பையும் ஏற்படுத்தி உள்ளது. முன்னதாக இன்று நடிகர் ரஜினிகாந்தின் மகளும், திரைப்பட இயக்குநருமான ஐஸ்வர்யா ரஜினிகாந்த் இயக்கி வரும் 'லால் சலாம்' திரைப்படத்தில் ரஜினிகாந்த் நடிக்கும் காட்சிகளுக்கான ஷூட்டிங் நிறைவடைந்ததையொட்டி படக்குழுவுடன் கேக் வெட்டி கொண்டாடியுள்ளனர்.அப்போது ரஜினிகாந்த் மொத்த படக்குழுவுடன் எடுத்துக்கொண்ட புகைப்படத்தை படக்குழுவினர் சமூக வலைத்தளத்தில் வைரலாகி வருகிறது.